Өнөөдөр Монголын чөлөөт бөхийн холбооноос хэвлэлийн хурал хийлээ. УИХ-ын гишүүн Д.Сумъяабазар, А.Сүхбат болон Монголын чөлөөт бөхийн холбооны тэргүүн Д.Дагвадорж нар үүсээд байгаа асуудлаар албан ёсны мэдээлэл өгч, өөрсдийн байр сууриа илэрхийллээ. Рио 2016  олимпийн наадам өндөрлөсний дараахан Д.Дагвадорж аварга UWW календарчилалын олон улсын тэмцээнд Монголын баг бүрэлдэхүүнийг хязгааргүй хугацаагаар хасах шийдвэр ирсэн байх шиг байна,  өсвөр, залуучууд, насанд хүрэгчид, мастер, бүх тамирчныг хасах асуудал яригдаж байна гэх мэдээллийг өөрийн албан ёсны твиттер хуудсаараа мэдээлж байсан билээ. Тэгвэл өнөөдөр албан ёсны мэдээлэл хийхдээ олимпоос хойш Чөлөөт бөхийн Холбооны удирдах зөвлөл хоёр удаа хуралдаж цааш яах тухайгаа хэлэлцлээ гэдгийг  Д.Дагвадорж аварга хэлсэн юм.

За харин А.Сүхбат аварга хэлэхдээ “Манай хоёр дасгалжуулагч бөхийн дэвжээнд танхай явдал гаргасанд  миний хувьд их харамсаж байна. 2016 оны олимпийн наадамд төр засгаас 8 тэрбум гаруй төгрөг шийдэж өгсөн нь урьд өмнө байгаагүй их хөрөнгө. Тамирчдыг амжилт гарга гэж энэ хөрөнгийг гаргаж өгсөн. Саяхан Олон Улсын Бөхийн Нэгдсэн Төрлүүдийн Холбооноос бидэнд бичиг ирээд, есдүгээр сарын 1-нд хариу ирүүл гэсэн. Үүнээс хойш МЧБХ-ны удирдлага хоёронтаа хуралдаж, шийдвэр гаргаж байна. Монголын ард түмэн болон төр засгаасаа бид уучлалт гуйж байна. Энэ зохисгүй явдлыг гаргасан хоёр дасгалжуулагчтай хариуцлага тооцох ёстой. Г.Мандахнарангийн хувьд олимпийн өмнө Риод олимпийн наадмыг зохион байгуулагчид барилдааны дүрмийн тухай маш тодорхой ярьж өгсөн. Тэгэхээр бид ард түмнээсээ уучлалт гуйж байна. Цаашдаа Монголын чөлөөт бөх хөгжих үү, эс хөгжих үү гэсэн асуудал үүсээд буй болохоор арга буюу энэ хэвлэлийн хурлыг хийлгэж байна.” гэсэн бол Д.Сумъяабазар гишүүн “Мандахнарангийн хувьд маш сайн барилдсан.  Г.Мандахнарангийн асуудал бол тусдаа. Дэлхийн Чөлөөт Бөхийн Холбооноос албан тоот ирэхдээ Монгол дасгалжуулагчдын үйлдэл дэлхийн нэгдсэн бөхийн холбооны нэр хүндийг гутаасан. Тиймээс танай бүх тамирчныг бүх төрөлд энэ асуудлыг шийдэгдтэл бүх тэмцээнд оруулахыг түдгэлзүүлж байна гэсэн байна. Есдүгээр сарын 1-н гэхэд ЧБХ байр сууриа илэрхийлж явуулах эрхтэй. Дараа нь олон улсын спортын арбитрын шүүхэд хандах эрхтэй гэсэн бичиг иржээ” гэсэн юм.

Түүнчлэн МЧБХ-ноос Ажлын хэсэг байгуулж Мандахнарангийн барилдааныг судлахаар болсон. Хэрэв медалиа эргүүлж авах боломжтой бол олон улсын арбитрын шүүхэд хандана гэлээ.  Харин хоёр дасгалжуулагчид холбооны дүрмийн 8.6-д заасан заалтыг зөрчсөн тул хариуцлага тооцож байна. Дасгалжуулагчид чөлөөт бөхийн үйл ажиллагаанд оролцох эрхийг хоёр жилээр хасаж байгаагаа албан ёсоор дуулгалаа.

МЧБХ-ны зүгээс мэдээлэл хийсэнтэй зэрэгцэн хоёр дасгалжуулагч хэвлэлийн хурал мөн хийсэн байгаа.

Уг асуудлаар эргэн мэдээлнэ.

Эх сурвалж: Шуурхай.мн