Чуулганаар Зөрчлийн тухай хуульд өөрчлөлт оруулах тухай хуулийн төслийг хэлэлцэх эсэх асуудлыг хэлэлцээд гишүүдийн олонх буюу 71,9 хувь нь дэмжлээ.  2015 оны 12 дугаар сарын 4-ний баталсан уг хуулийн хэрэгжих хугацааг 2016 оны 9 дүгээр сарын 1 буюу батлагдсан өдрөөс 9 сарын дараа байхаар хуульчилсан байсан.

Д.Сарангэрэл гишүүн уг хуультай холбогдуулан үг хэлэхдээ “Хэрэгжих хугацааг хойшлуулах нь зөв. Эргэж харах олон асуудал бий. Тухайлбал компанийг торгох тухай асуудал нь хэрээс хэтэрсэн их торгууль тавих болчихоод байна. Компаниуд олдог орлогоосоо илүү торгууль тавьчихвал бэрх болно. Харин хойшлуулах хугацааны хувьд 2017 оны долдугаар сарын 1-н хол байна. Хэрэв Зөрчлийн хууль хэрэгжиж эхэлбэл 400-500 хүн чөлөөлөгдөх тухай асуудал яригдаад байгаа юм байна лээ. Иймд дөрөвдүгээр сарын 1-н юм уу, гуравдугаар сарын 1-н  гэж наашлуулах боломж байна уу.

Дээр нь сэтгүүл зүйн салбарт 6000 хүн ажиллаж байна. Энэ нийгмийг соён гэгээрүүлж, хөдөлгөх хүч нь болж байгаа хүмүүс шүү. Сэтгүүл зүйтэй холбоотой үйл ажиллагааг Эрүүгийн хуулиар шийддэг манайхаас өөр орон байхгүй болчихсон. Иймд хүн гүтгэсэн сэтгүүлчийг шоронд хорихоос илүү ёс зүйн шийтгэл хүлээлгэх нь зөв шийтгэл. Цаашид ажлын хэсэг Зөрчлийн тухай хуульд өөрчлөлт хийгээд оруулж ирэхдээ хэвлэлтэй холбоотой заалтыг өөрчлөх юм бол сэтгүүлзүйн салбар босох байх шүү.” гэж байв.

За харин АН-ынхны тухайд уг хуулийн хэрэгжих хугацааг хойшлуулах асуудлыг эсэргүүцэж, хүчин төгөлдөр хуулиар оролдох гэлээ гэж байсан юм.