Ээлжит бус чуулганы хуралдаанаар  “Монгол Улсын Засгийн газрын 2016-2020 оны үйл ажиллагааны хөтөлбөр батлах тухай” Улсын Их Хурлын тогтоолын төслийг хэлэлцэх эсэхийг хэлэлцэж байна энэ цаг мөчид. Түүнчлэн уг асуудалтай холбогдуулан Сангийн сайд гишүүдийн асуултад хариулах үеэрээ  “2016 оны зургаадугаар сарын 30-ны байдлаар 179 300 төрийн албан хаагч бий. 2012 онтой харьцуулахад энэ тоо 40 мянгаар нэмэгдсэн. 2017 оны төсвийн төсөөлөлд төрийн албан хаагчдыг 20 мянгаар цомхотгоно гэж бид төлөвлөсөн. Гэхдээ зөрүүлээд ажлын байраар хангах хөтөлбөр боловсруулна”  хэмээн мэдэгдлээ. Мэдээж энэ бол анхаарал татсан тоо. Эдийн засаг хүндрэлтэй, бүх зардлаа танана гэж байгаа ийм үед зөрүүлээд ажлын байрыг хэрхэн бий болгох вэ гэдэг нь  ойрын хугацаандаа бол эргэлзээтэй л асуудал болоод байгаа юм.

Ер нь бол Засгийн газрын үйл ажиллагааны хөтөлбөрийг ямар байдлаар батлаж гаргах вэ гэдэг нь анхаарал татсан асуудал болоод байна. Ерөнхий сайд хэлэхдээ эдийн засгийн хүндрэлийг богино хугацаанд даван туулах, тогтворжуулах хөтөлбөр боловсруулна гээд байгаа. Түүнчлэн ОУВС-ын “Стэнд бай” хөтөлбөр нь тогтворжуулах хөтөлбөр гэдэг утгаараа тийшээ л орж таарах байх гэсэн хувь заяагаа дагахаас өөр аргагүй болсон хүлээлт бас үүсээд байгаа билээ.

Ямартай ч засгийн зүгээс эхний ээлжинд эдийн засгийг тогтворжуулах, төсвийг нэгтгэх, төсвөөс гадуурх санхүүжилтийг зогсоох зэрэг арга хэмжээ авч хэрэгжүүлнэ гэснээрээ ажиллах биз. Тэрчлэн Засгийн газрын хоёр үе, шаттай хөтөлбөрийг хэрэгжүүлэхэд нийт 33.2 их наяд төгрөг шаардлагатай гэсэн урьдчилсан тооцоо гаргасан байгаа. Хямралын энэ үед сонсоход бол их том тоо байгаа. Тэр утгаараа эх үүсвэрийг хэрхэн яаж олох вэ гэдэг нь асуудал. Тэгвэл  Ерөнхий сайд  хэлэхдээ “Тооцооллыг дахин нарийвчилж байна. Одоогийн байдлаар 26-28 орчим их наяд төгрөг болох урьдчилсан тооцоо бий. Монгол Улсын Засгийн газар цаашид олон төслийн хойноос хөөцөлдөхгүй. Эхний ээлжинд салбар бүрийн 2-3 томоохон төслүүдээ хэрэгжүүлнэ. Энэ хүрээнд томоохон төслүүдээ хөдөлгөх эх үүсвэрийг гадаадын хөнгөлөлттэй зээл тусламж болон бусад хөрөнгө оруулагчийн хүрээнд босгоно” гэсэн. За харин Сангийн сайдын хэлж байгаачлан 20 мянган төрийн албан хаагчийг цомхотгож, хэмнэх мөнгөө мөн тэдгээр хөтөлбөрийнхөө санхүүжилтэд зориулах эсэх нь одоогоор бас л хариулт нэхсэн асуулт болоод байна.

Эх сурвалж: Шуурхай.мн