Рио-гийн олимпийн дэвжээн дээр хүрэл медалийн төлөө  хүч, оюун ухаанаа гарган барилдсан Г.Мандахнаранд шижир алтаар цутгасан медаль бэлэглэх, хандивын аян эхлүүлж байгаагаа Монголын Чөлөөт Бөхийн Мастеруудын холбооны гишүүн Д.Алтанхуяг нарын хүмүүс мэдээлэл хийн, нийтэд дуулгаад байсан билээ. Тэдний энэхүү саналыг хүмүүс дэмжиж байгаагаа илэрхийлж, нэг их удаагүй байхад 20 сая төгрөг цуглаад байгаа талаар зохион байгуулагчид мэдээлж байсан.

Тэр ч утгаараа Г.Мандахнарангаа Рио-гоос Улаанбаатарт газардахад нь Монгол түмэн хадаг сүү бариад угтахад болохгүй юмгүй байв. Г.Мандахнарангийн тухайд олимпийн хүрэл медалийг энгэртээ зүүж ирээгүй ч, өөрийн хурц дайчин  барилдаанаараа бол  хэдийнээ хүрэл медалийн эзэн болсон гэж болно. Олимпийн наадмын мөнгөн медальт Д.Сумъяа, олимпийн хүрэл медальт Д.Отгондалай нарыг нисэх буудалд газардахад нь Монголчууд тэр аяараа л хүндэтгэл үзүүлж, баяр хүргэсэн. Мэдээж тэр бол зүй ёсных.  Тэгэхдээ Г.Мандахнарандаа ч бас хүндэтгэл үзүүлж угтахад яагаад болохгүй гэж. Уг нь тэрбээр Д.Отгондалайтай хамт нутагтаа ирсэн. Гэхдээ нисэх буудлын доод давхраар гараад явсан байгаа юм. Түүнийг тийн чимээгүй гараад явж байхад нөгөөх Монголын Чөлөөт Бөхийн Мастеруудын Холбоо болон бөх тайлбарлагч С.Шижирбат нарын сураг алга байв.

Г.Мандахнаран хэлэхдээ  “Монгол түмнийхээ итгэлийг алдахгүй юмсан гэж өөртөө итгэлтэй барилдсан. Хэдийгээр хүрэл медаль болзол хангасан ч гэлээ шүүгчдийн луйвар энэ удаа надад тохиолоо. 36 жил тасраад байсан чөлөөт бөхийн эрэгтэйчүүдийн медалын буухиаг үргэлжлүүлсэн гэж бодож байна. Монголын ард түмэн ингэж бодож байгаа гэдэгт итгэлтэй байна.” хэмээн хэлснийг тодотгоё.