Үнэт цаасны арилжаа эрхлэгчдийн холбооноос өнөөдөр хэвлэлийнхэнд хандаж мэдээлэл хийлээ.Тус холбоонй зүгээс Засгийн газрын шийдвэрийг эсэргүүцэж байгаа аж. Тодруулбал,  иргэдэд олгосон “Эрдэнэс Тавантолгой”  компанийн 1072 ширхэг хувьцааны 30 хувийг Засгийн газар худалдаж авах асуудал нь хууль зөрчиж байгаа гэдгийг хэлж байна.

Тус холбооны зүгээс тавьж шаардлагуудыг үзэхэд, хувьцааны 30 хувийг худалдах үйл явцыг арилжааны банкаар хийж буй нь хууль зөрчсөн хэрэг. Хуулийн дагуу брокер, диллерийн компаниар дамжуулах хэрэгтэй гэж байна. Энэ нь ч зүйн хэрэг болохыг бусад эдийн засагчид хэлж буй. Хөрөнгийн зах зээл гэх их айлын хууль дүрмийг шууд зөрчин, арилжааны банкыг илт дэмжсэн үйл ажиллагаа явуулж байна гэж тэд шүүмжилцгээж байгаа юм. Үнэт цаасны зах зээлийн тухай хуульд зааснаар аливаа компанийн хувьцаа гаргах асуудлыг үнэт цаас борлуулах тусгай зөвшөөрөлтэй буюу брокер, диллерийн компаниар л хийх ёстой гэжээ. Энэ ч үүднээс өнгөрсөн хугацаанд 1072 ширхэг хувьцаа эзэмшсэн 700 мянга гаруй хүн брокер, диллерийн компанид данс нээлгэсэн байжээ. Гэтэл энэ хуулийг Засгийн газар өөрөө зөрчин, арилжааны банкуудаар дамжуулах болсон гэлээ.

За мөн “Эрдэнэс Тавантолгой” ХК-ийн эрхзүйн статусыг тодорхой болгож, үнэт цаасны зохицуулалттай зах зээл, СЗХ-нд бүртгүүлэх ёстойг тэд хэлж байна. Түүнчлэн иргэдэд олгосон гээд байгаа хувьцааг зөвхөн Засгийн газар худалдаж авах бус тухайн иргэн өөрөө захиран зарцуулах эрхийг нээж өгөх шаардлагатай гэсэн гурван асуудлыг тэд тавьж байна.

Б.Тамир

Эх сурвалж: Шуурхай.мн