Монголын инээдмийн киноны түүх  “Өнөр бүл” киноны жүжигчдийн гэгээн дүрээр  үзэгчдийн сэтгэлд хоногшин үлдсэн байдаг. Тус кино хэдийгээр инээдмийн төрлийнх боловч хэлэх гэсэн санаа бүр нь үзэгчдэд уярал, ухаарлыг бэлэглэсэн гайхамшигтай бүтээл болсон. Тэгвэл, тус бүтээлийг саяхан залуу уран бүтээлчид шинэчилэн “Өнөр бүл өнөө цагт” нэртэйгээр үзэгчдийн хүртээл болгосон.

Үүнтэй холбогдуулан, “Өнөр бүл” киноны ахмад уран бүтээлчид болох МУГЖ Ч.Алтан-Өлзий, Ц.Цэнд-Аюуш нар өнөөдөр мэдээлэл хийлээ.

Гавьяат жүжигчин Ч.Алтан-Өлзий хэвлэлийн хурлын эхэнд хэлэхдээ, Өнөр бүл киногоор маань залуучууд маань “Өнөр бүл өнөө цагт” нэртэй кино гэхэд хэцүүхэн киног бүтээсэн юм шиг байна лээ. Би “Өнөр бүл” киноынхоо хоёрдугаар ангийг хийх гэж сүүлийн хэдэн жил ярьж яваа юм. Гэвч энэ киног бүтээхэд 250 сая төгрөг хэрэгтэй байгаа. Тэр мөнгө байхгүй учраас би өнөөдрийг хүртэл киногоо хийж чадахгүй явна.  Тиймээс ард түмнээсээ кино бүтээхэд минь туслаж хандив өргөхийг хүсэж байгаагаа энэ дашрамд хэлмээр байна” гэсэн юм.

Мөн тэрбээр, “Өнөр бүл өнөө цагт” киноны талаар “Боловсрол” телевизийн нэвтрүүлэгт намайг урьсан. Тэгээд миний хэлсэн үгсийг монтажлаад, киног хийхийг нь дэмжиж байгаа юм шиг болгоод нэвтрүүлгийг олон нийтэд хүргэсэн байна лээ. Уг нь би анхнаасаа эсэргүүцэж байсан. Мөн “Өнөр бүл өнөө цагт” киноны хүмүүс над руу болон “Өнөр бүл” киноны зохиолчийн хүү рүү утасдан “Мөнгө өгье” гэсэн. Мэдээж бид зөвшөөрөөгүй. Би өнөөдөр 50 жил урлагт зүтгэхдээ өөрийгөө худалдаж үзээгүй. Алтан үеийнхний хийсэн кино өнөө цагт гологдоод байгаа болохоор шинэчилж байгаа нэрээр иймэрхүү кино бүтээдэг болсон юм болов уу л гэж бодож байна” хэмээн нулимс дуслуулан ярьсан юм.

Харин Гавьяат жүжигчин Ц.Цэнд-Аюуш хэлэхдээ, “Өнөр бүл-Өнөө цагт” киноны талаар өөрийн бодлоо хэлж, сэтгэл гонсгор байгаа талаараа ярьсан юм. Тэрбээр “Тэр киног үзээд миний ухаан хүрээгүй. Хошин урлагийн залуучууд тоглоод, сайхан кино бүтээсэн байх” гэж бодоод очсон. Гэтэл бидний хэлж байсан үгнүүдийг тэр чигээр нь шахуу хэлж байна билээ. Би үзэгчдийн дунд суугаад, тэр киног үзсэн. Миний дүрд Ц.Оюундарь тоглосон байсан. Яг миний хэлдэг үгнүүдийг дуурайж хэлж байна лээ. Нэг зүйл өөр байсан нь Ц.Оюундарь киноны ихэнх хэсэгт бохь зажилж байна лээ. Тэгэхээр нь тэр үед би бохь зажилахыг нь орхисон юм байна. Тэгээд шинэчилсэн юм байна гэж бодож суусан. Кино дууссаны дараа өөрийн эрхгүй өөрөөсөө л ичсэн дээ. Нэг бодлын Ц.Оюундарь ингэж тоглох ёстой байсныг ингээд тоглочихож гэж гаргаад ирж байгаа юм шиг. Нөгөө бодлын арай өөр ч юм шиг. Ёстой ухаан хүрэхгүй юм билээ. Зарим киноны мэргэжлийн хүмүүс сайн кино болсон гэж ярьж байгаа харагдсан. Харин би гайхаад л байгаа” гэсэн юм. Мөн энэ киноны хоёрдугаар ангийг заавал хийх хэрэгтэй. Тиймээс энэ жил урлагт зүтгэсний 50 жилийн ой нь тохиоу буй Ч.Алтан-Өлзийд маань киногоо бүтээхэд нь туслаад сэтгэлийн хандив өргөхийг нийт ард түмэндээ уриалж байна” гэв.

Дашрамд, “Өнөр бүл-2” кинонд 36 жилийн дараах Цэрмаа, Гармаа хоёр болон хоёр ихэр хэрхэн аж, төрөн амьдарч байгааг харуулах аж.

Т.Гэрэл

Эх сурвалж: Zaluu.com