УИХ-ын гишүүн асан Ш.Сайхансамбуугийн охин С.Эрдэнэтуул машинаар  хүн дайрсан гэх мэдээлэл зарим хэвлэл мэдээллийн хэрэгслээр гарч байсан байдаг. Тэгвэл энэ жил НИТХ-ын сонгуульд нэр дэвшиж байгаа тэрбээр хэдэн жилийн өмнө гарч байсан тэрхүү мэдээллийг үгүйсгэсэн тайлбарыг хэвлэлээр хэлж байна. Тэр хэлэхдээ  “-Тэр тухай одоогоос арав гаруй жилийн өмнө шар хэвлэлээр бичиж байсан. Ор үндэслэлгүй мэдээлэл шүү дээ. Надтай холбоотой ийм мэдээлэл өмнө нь гарч байсан гээд ижил гарчиг, ижил утгатай мэдээллийг хэд хэдэн цахим сайтаар гаргасан байна лээ. Би эхэндээ гомдож, их эмзэглэдэг байсан ч шүүх цагдаа бололгүй тэгсгээд мартдаг байсан. Харин цаашид ийм байдал давтагдвал хуулийн байгууллагад нь хандана. Ор үндэсгүйгээр хүнийг гүтгэсэн этгээд тодорхой хэмжээгээр хуулийн хариуцлага хүлээх ёстой биз дээ. Тухайн үед бизнесийн салбарт дөмөгхөн яваа хүмүүсийн хүүхдүүдээр оролдож л тэгдэг байсан юм шиг байгаа юм. Нэр төрд халдах, гүтгэх нь   ганц надад ч биш бүх л хүнд хэцүү тусна. Бүр намайг хар тамхи хэрэглэсэн гэж гүтгэсэн байна лээ. Тэгж бичиж байгаа хүмүүс тухайн хүнээ ямар байдалд орж байгааг боддог болов уу. Бид яагаад нэгнээ ингэж гүтгэн, доромжилж гутаасан зүйл бичиж, ярьдаг юм бэ. Яагаад бие биенээ хүндэтгэж, хүлээн зөвшөөрч болдоггүй юм бэ. Тун их харамсал төрж байна. Магадгүй захиалгатай байж болох юм. Энэ асуудлыг шаардлагатай бол би хуулийн байгууллагаар шалгуулж, шүүхээр шийдвэрлүүлнэ.” хэмээн ярьсан байна.