Ховдоос наашаа  нийслэл рүү хөөрөх гэж байгаад зурвасаас гарч, улмаар хөдөлгүүр нь эвдэрсэн  МИАТ-ийн Бойнг-737 онгоцыг бүрэн бүтэн болгохын тулд Засгийн газар 5 сая 438 мянган ам.доллар зарцуулсан талаарх мэдээллийг хүргэсэн билээ. Гэтэл Монголын Засгийн газар НӨАТ-ын буцаан олголтод одоогийн байдлаар өгөх ёстой  5.8 тэрбум төгрөг байхгүй гэнэ. Ер нь бол Засгийн газрын тэргүүн Ч.Сайханбилэг энэ сонгуулиар АН-д оноо нэмэх асуудлыг л гаргаж ирж яриад байгаа болохоос утгаар нь хэрэгжүүлэх гэхээр хөрсөн дээр буухад хэцүүхэн зүйлсийг хийгээд байгаа гэдгийг нь хэлэх хүмүүс цөөнгүй байна.

Уг нь Ерөнхий сайд Ч.Сайханбилэг НӨАТ-ын мөнгийг улирал тутам олгох, 2016 оны буцаан олголтын 20 хувьд ногдох мөнгийг дөрөвдүгээр сард багтааж иргэдэд олгохыг Гааль, татварын ерөнхий газарт үүрэгдсэн дээ. Гэтэл өнөөдрийн өдрийг хүрчихээд байхад Ерөнхий сайдын үүрэг хэрэгжсэнгүй ээ. Гааль татварын ерөнхий газрынхны тооцоогоор Ерөнхий сайдын үүргийг биелүүлэхэд,  НӨАТ-ын буцаан олголтод 5.8 тэрбум төгрөг одоогоор шаардлагатай байгаа аж. 2016 онд бол нийтдээ 50 тэрбум төгрөгийг НӨАТ-ын буцаан олголт хэлбэрээр өгөх ёстой. Гэвч дөрөвдүгээр сард багтаан шийдчихсэн байх учиртай  5.8 тэрбум төгрөгийг одоо хүртэл шийдээгүй байгаа юм. Засгийн газрын тааруухан үйлдлүүд үүгээр дуусахгүй нь.

Ямартаа л төсөв мөнгөгүй байж сонгуулиас нэг сарын өмнө тэтгэвэр, тэтгэмжийг 21 мянган төгрөгөөр нэмэгдүүлж байгаа нь үнэндээ бол дэндүү болхи хийгээд сонгогчдыг доромжилсон арга л харагдаж байгаа юм. Улсын төсөвт суулгаагүй, төсөвт тодотгол хийж нэмж суулгаагүй хэрнээ сонгуулийн сар учраас энэ сардаа аргалаад шийдлээ гэхэд ирэх саруудад ахмадууд ямар ч нэмэгдэл авч чадахааргүй байр байдалтай байна. Харамсалтай нь, Засгийн газар тун буруу замаар замнаж ирснийг бататгах баримт бол ахмадын тэтгэврийг сар бүр 200 мянган төгрөгөөр нэмэгдүүлэх мөнгийг гадаад өрийнхөө зөвхөн хүүгийн төлбөрт сар тутам төлж байгаа явдал юм. Тодруулбал, сар бүрийн 200 мянган төгрөгийн нэмэгдэлтэй  дүйх  970 тэрбумыг өрийнхөө хүүнд төлж байна. Гэсэн мөртлөө ахмадууддаа тэтгэврийг чинь 21 мянгаар нэмж байгаа шүү гэж чихрээр хүүхэд хуурч байгаа юм шиг алхмыг хийж байгаа нь харамсалтай.

 Эх сурвалж:  Б.Тамир  Шуурхай.мн