МАН-ын удирдах зөвлөлийн гишүүн, Дундговь аймгийн МАН-ын дарга Б.Амарсанаагийн нэр төрд халдаж, гүтгэсэн гэх прокурорын мэдэгдэл гарчээ. Тодруулбал, өнгөрсөн дөрөвдүгээр сарын эхээр Б.Амарсанааг ИТХ-ын дарга С.Буджавт “гар хүрч” чамархайг нь цөм цохьсон гэх мэдээ мэдээлэл цахим сайтууд болон өдөр тутмын сонинд гарсан билээ. Тухайлбал, “Б.Амарсанаа намын нөхдийн хамт орон нутгийн иргэдэд төр засгийн бодлого шийдвэр танилцуулж явахдаа ИТХ-ын дарга С.Буджавыгаа бүлэглэн зодсон” гэх утга бүхий мэдээлэл түгсэн. Үүнийг Б.Амарсанаа “Үндэслэлгүйгээр нэр төрд халдаж байна. Энэ бол ташаа мэдээлэл” хэмээн мэдэгдэж байв. ИТХ-ын дарга С.Буджав ч өөрийн цахим хуудастаа Б.Амарсанаа болон намын бусад хүмүүсийн нэрийг бичиж “Намынхандаа зодуулчихлаа” хэмээн хавдартай нүүрээ аймгийнхаа фэйсбүүкэд оруулж өөрийгөө өрөвдүүлэх оролдлого хийсэн ч хариуд нь урваач, шарваачаараа дуудуулж өөртөө “хасах” оноо цуглуулсан гэдэг. Тэрбээр аргаа барахдаа оруулсан зураг, мэдээллээ устгаж фэйсбүүкийн “гал”-ыг түр дарсан гэх юм билээ. Тэгвэл хэргийг Дундговь аймгийн прокурорын газраас хянаж үзээд “Дээрх мэдээллийн улмаас Б.Амарсанаа  таны талаар нийгэмд сөрөг мэдээлэл гарсан байх тул Иргэний хуулийн 511 дүгээр зүйлд заасанчлан “Бусдын нэр төр, алдар хүнд, ажил хэргийн нэр хүндийг гутаасан этгээд түүнийгээ бодит байдалд нийцэж байгааг нотолж чадахгүй бол эд хөрөнгийн хохирол арилгасныг үл харгалзан, эдийн бус гэм хорыг мөнгөн болон бусад хэлбэрээр арилгах үүрэг хүлээнэ” гэж заасны дагуу гэм хорыг арилгах, нэр төрөө сэргээлгэх талаар иргэний журмаар шүүхэд хандаж шийдвэрлүүлэх нь зүйтэй байна” гэжээ.