Нэгэнтээ Ч.Сайханбилэг Ерөнхий сайдын зүгээс МАХН-ын гурван сайдыг чөлөөлөх хүсэлтээ гаргасан тул, намын бүлгээр хэлэлцээд дэмжсэн байна. УИХ дахь АН-ын бүлэг  хаалттай хуралдаанаараа уг асуудлыг хэлэлцэж, гишүүдийн 100 хувийн саналаар дэмжжээ. Харин шинэ сайд нарын нэрсийг хэлэлцээгүй байна.

Сонгууль хаяанд ирсэн байхад Ч.Сайханбилэгийн тэргүүлж байгаа кабинет нэлээд хөдөлгөөнтэй байна. С.Ламбааг Эрүүл мэнд, спортын сайдаар суулгасныхаа араас Шадар сайд Ц.Оюунбаатар, Барилга хот байгуулалтын сайд З.Баянсэлэнгэ, Батлах хамгаалахын сайд Ц.Цолмон нарын оронд суух хүмүүсийг хэсэг ч болов хугацаанд авчрах шаардлагатай болж байна. Ёстой нөгөө нэр төдий сайд нар л ирээд буцах бололтой юм.

Ч.Сайханбилэг хэлэхдээ хамтарч Засгийн газар байгуулсан нам, эвслээс МАХН-МҮАН-ын “Шударга ёс” эвслийн бүлэг татан буугдаж, эвслийн нэг субьект МҮАН Улсын Их хурлын 2016 оны ээлжит сонгуульд Ардчилсан намыг дэмжиж оролцохоор шийдвэрлээд байна. Харин МАХН-ын хувьд Улсын Их Хурлын 2016 оны сонгуульд бие даан оролцохоор шийдвэрлэсэн тул улс төрийн соёл, дэлхий нийтэд баримталдаг нийтлэг жишгийг харгалзан үзэж, тэднийг танхимаасаа явуулах нь зүйтэй гэж үзэж байна гэж байгаа юм. Тэгэхээр одоо дэлхий нийтийн жишгийн дагуу шинэ сайд нарын нэрс тодрохыг хүлээх хэрэгтэй боллоо. Чуулганыг хаахаас өмнө амжуулж томилох ёстой тул 7 хүрэхгүй хоногийн дотор л шийдэх хэрэгтэй гэсэн үг. Гэтэл тэгээд сонгуульд нэр дэвшигчдий тодруулах хугацаа тулчихаад юм юм л давхцаж байна даа.

Б.Тамир

Эх сурвалж: Шуурхай.мн