Тавантолгой ордыг эргэлтэд оруулах асуудлыг энэ чуулганаар багтаах тухай яригдаж байгаа. Өнгөрсөн жил хэлэлцээрийн түвшинд ид явж байхад нь, нам дарж авсан нөхдүүд сонгуулиас өмнө чулуу болгох гээд байгаа янзтай. Тэгэхдээ Л.Эрдэнэчимэгийн хэлж ярьж байгаагаас үзэхэд уг асуудал дээр нэлээн анхаарал тавих шаардлага байна. Тэр хэлэхдээ  “Бид Тавантолгойн 51 хувийг эзэмшинэ гэхээр Монгол Улс тодорхой хэмжээний хөрөнгө өөрсдөө гаргана. Тавантолгой бол ирээдүйд ашигтай төсөл  учраас шаардлагатай хөрөнгийг босгох хэрэгтэй. Урт хугацааны зээл авч болно. Төмөр зам бол 10 жилийн дотор оруулсан хөрөнгөө нөхчихдөг  ашигтай төсөл юм.  Өмнө нь бүх тооцоог хийсэн. Тэр ч утгаараа бүтээн байгуулалтын ажил эхлээд явж байсан. Ер нь төмөр замд хөрөнгө оруулах сонирхол их байдаг. Тиймээс 10-20 жилийн хугацаатай зээлээр төмөр замаа барих боломжтой.” гэж байгаа юм. Тэгэхээр гаднаас баахан өр шир тавиад мөнгө олоод ирсэн Монголын Засгийн газар Тавантолгойг эргэлтэд оруулах гэж байна гээд бас баахан өр тавиад, тэгээд сүүлдээ өнөөх өрөө төлж дийлэхгүй болоод ирэхээрээ Тавантолгойгоо тэрчигт нь өгөх хэрэг гарахгүй гэх баталгаа ер нь байна уу. Өнөөдрийн Монголын төр дэх нөхдүүдэд эрх мэдэл, өөрсдийн эрх ашиг л чухал болохоос Монголын маргааш ер нь асуудал биш бололтой.

Б.Тамир

Эх сурвалж: Шуурхай.мн