С.Ламбаа ямарч байсан сарын хугацаанд сайдаар суух нь ойлгомжтой болж байна. Өнөөдөр УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаан болж, Эрүүл мэнд, спортын сайдад өдгөө тус яамны  Төрийн нарийн бичгийн даргаар ажиллаж буй  С.Ламбааг нэр дэвшүүлснийг гишүүдийн олонхи нь дэмжлээ.

Уг нь С.Ламбаагийн тухайд улаанбурхантай тэмцээд юун тэр сайдтай манатай явна хэмээн ярьсан байсан юм. Сэтгүүлч түүнээс  “Таныг Эрүүл мэндийн сайдад томилохоор нэрийг нь өргөн барьсан гэх мэдээлэл байна. Энэ үнэн үү? хэмээн асуухад  “-Юун сайд вэ. Мэдэхгүй. Би улаан бурхан өвчинтэй тэмцэх гээд түмэн завгүй л явна.” гэж бүр өөрөө хариулсан байдаг. Тэгэхээр С.Ламбаад өөрт нь мэдэгдэхгүйгээр л сайдаар томилох гээд байгаа юмдаг уу даа.

С.Ламбаа эрхмийн тухайд С.Батболдын кабинетад багтаж, Эрүүл мэндийн салбарыг удирдаж явсан намтартай. Тэрчлэн түүнийг салбарын яамыг толгойлж байх үед буюу 2011 оны эхний хагас жилд гэхэд 33.694 эх амаржсанаас 607 хүүхэд нэг хүртэлх насандаа эндэж,17 эх нас барсан гэсэн харамсалтай статистик судалгаа гарсан байдаг. Тэрчлэн С.Ламбааг сайд байх үед эрүүл мэндийн салбарт эмч нарын хууль журам зөрчсөн асуудал цөөнгүй гарч байсныг эргэн сануулж байна.

Бяцхан охины үхлийг аппаратанд тохсон хэрэг

Эх нялхсын эрдэм шинжилгээний төвийн эмч нарын буруугаас нярай хүүхэд хорвоог орхисон гэх мэдээллийг уншигч та санаж байгаа болов уу. Уг мэдээллийн мөрөөр Баянгол дүүргийн Цагдаагийн хэлтсээс тус төвийн эмч нарыг шалгаж  эхлэсэн байдаг, харин хэрхэн шийдэгдсэн нь тодорхой бус байна. Хэрэг явдлыг эргэн сануулахад, Эх нялхсын эрдэм шинжилгээний төвд иргэн Н-гийн  эхнэр Э   2011 оны   есдүгээр  сарын 5-ны өдөр нярайлж  3кг 200 грамм охин төрүүлжээ. Төрөлтийн явцад Э эмэгтэйн охин архаг бүтэлттэй гарсан тул  эмнэлгийн ажилтнууд хүчилтөрөгчийн аппарат залгажээ. Гэтэл аппаратаас хий алдаж ээлжийн хоёр сувилагч  гэмтэл гарсан хэсгийг бохиор наах оролдлого хийж   будилах  зуур бяцхан охин амь насаа алдсан харамсалтай хэрэг гарсан байдаг. Хорвоод мэндэлсэн бяцхан охин дэндүү харамсалтайгаар  амь насаа алдчихаад байхад тус төвийн тасгийн эрхлэгч “Эмч нар буруугүй , аппарат буруутай” гэсэн тайлбарыг хэлж байсан нь хэн хүний сэтгэлийг урсан үгс байлаа.

Бяцхан хүүгийн үхэлд бас л эмч буруугүй

Баянзүрх дүүргийн нэгдсэн эмнэлгийн хүүхдийн тасагт 2010 онд бяцхан хүү эмч нарын буруутай үйлдлээс болж, амиа алдсан хэрэг гарсан байдаг. Талийгаач хүү эхлээд уушгины хатгалгаагаар өвдөж, тус эмнэлэгт хандсан бөгөөд эмчлэгч эмч н.Энхжаргал бүрэн эдгэсэн хэмээн оношилж, эмнэлгээс гарахыг зөвшөөрсөн байна.  Хүү эмнэлгээс гараад удаагүй байтал тус дүүргийн 24-р хорооны өрхийн эмч “Вакцин хийлгэ” гэсний дагуу хүүд вакцин хийлгэсэн аж. Хүү тэр өдрөө халуурч биеийн байдал нь муудсаар дүүргийн эмнэлэгт хүргэгджээ. Онош тодруулна гэх шалтгаанаар бяцхан хүүгийн нугаснаас ус авахад  хүүгийн биеийн байдал улам хүндэрч улмаар амьсгал хураасан байдаг. Шүүхээс уг эмчийг буруугүй хэмээн шийдвэрлэж, харин хүүгээ алдсан эцэг эх насан туршдаа сэтгэлийн шархтай хоцорсон харамсалтай хэрэг С.Ламбааг сайд байх үед гарсан юм.

5-хан сартай охиныг үхэл рүү түлхэв үү?

Д.Алтантунгалаг хэмээх эмэгтэй III төрөх эмнэлэгт эрүүл, саруул охин төрүүлсэн байдаг. Гэтэл өрхийн эмчийн буруугаас охин нь  тавхан сартайдаа   тархиндаа бүтэн харвалт авчээ. 2011 оны зургадугаар сарын 11-нд охиндоо ээлжит вакциныг нь хийлгэснээс болоод бяцхан охин хорвоод амьдрах эрхгүй болжээ. Хан-Уул дүүргийн өрхийн эмч Г.Ариунбайгаль охиныг ханиадтай байсныг мэдээгүй юу, мэдсээр байж хэргээр  ийм үйлдэл гаргасан уу. Ямарч байсан түүний буруугаас болж бяцхан охин хохирогч болж үлдсэн байна. Харин хариуцсан эмч нар өөрсдийнх буруугаас болоод бяцхан охин хохирсонд ямар нэг хариуцлага хүлээгээгүй гэх мэдээлэл бий.

Эмч нар бяцхан охины тархийг үхжүүлсэн хэрэг

ЭНЭШТ-ийн эмч нарын хариуцлагагүй үйлдлээс болж 10 сартай М.Номинжин охины нүд нь харахгүй, чих нь сонсохгүй тархи нь бүрэн үхжсэн тухай дэндүү харамсалтай мэдээллийг уншигч та авч л байсан байх даа. Охины ээж хэлэхдээ “-Миний охин гурван сартайдаа хатгаа аваад Сүхбаатар дүүргийн эмнэлэгт хэвтсэн юм. Тэнд долоо хоноод бид өөрсдийн хүсэлтээр ЭНЭШТ рүү шилжүүлсэн. Эх нялхаст хэвтээд дөрөв хонож байхад нь венийн судсанд нь гуурс тавихаар болоход захын судаснууд нь олдохгүй байсан учраас эмчилгээ хийх шаардлагатай гэсэн. Тэгээд эмчилгээ хийх явцдаа Б.Одгэрэл эмч охины минь уушгийг хатгасан байсан ч тэрийгээ тэр чигт нь анзааралгүй орхисон байсан. Улмаар миний охины бүх бие хавагнаж, эрхтэн нь хийгээр дүүрч, зүрх нь зогссон. Тэгээд уушгийг нь хатгасныг мэдсэн. Уушгийг нь хатгаснаас хойш бараг найман цаг өнгөрсөн байсан. Хүний зүрх зогссоноос хойш тархи нь таван минут л тэсдэг гэсэн. Гэтэл манай охины зүрх бараг цаг гаруй зогссон байсан. Яаралтай эмчилгээнд оруулснаар маргаашнаас нь зүрхэнд нь амьсгал орж ирсэн ч хоёр хоногийн дараа зүрх нь дахиад зогсч, аппаратанд орсон. Тухайн үед эмч нар найдваргүй гэсэн. Бид хувиараа хөөцөлдөж, хүчтэй эм тариа хийлгэснээр охин минь одоо сэргэсэн. Ухаан ороод хоёр ч хоноогүй байхад нь бид хоёрыг тасаг руу шилжүүлсэн. Анх эмнэлэгт ирэхдээ бага зэрэгт хатгаатай, шингэн алдсан гэсэн оноштой ирсэн хүүхдийн минь биеийн байдал эмнэлэгт ирснээсээ хамаагүй дордсон. Би эмчид нь энэ талаар хэлсэн боловч “Зүгээр ээ, их эм тариа хийсэн болохоор бие нь жаахан хямарсан байх. Харин сая зүрх нь зогссон болохоор зүрхний эмчийн хяналтад өгөөрэй. Тэгэхдээ хоёр жилийн дараа эрүүл болно” гэж хэлсэн хэмээн ярьсан нь бий. Гэвч охин эрүүл болоогүй.

Эх нялхсын эрдэм шинжилгээний төвийн их  эмч Б.Одгэрэл, С.Очир нарт холбогдох хэргийн анхан шатны шүүх хурал 2011 онд   Баянгол дүүргийн шүүхэд болж хэргийг нэмэлт мөрдөн байцаалтад буцааж байсан. Тэдэнд эрүүгийн хуулийн 106.2  зааснаар Эмч, эмнэлгийн ажилтан өвчтөнд эмнэлгийн тусламж үзүүлэх үүргээ хүндэтгэх шалтгаангүйгээр биелүүлээгүй буюу зохих ёсоор биелүүлээгүйгээс  өвчтний бие  махбодид хүнд гэмтэл учруулсан гэх үндэслэлээр  буруутгасан байдаг. Тус хэрэг Баянгол дүүргийн цагдаагийн хэлтэс,  Эх нялхсын эрдэм шинжилгээний төв, Шүүх эмнэлэг гурвын дунд гурван жил шахам явж эцэст нь охины өвчний түүх өөрчлөгдөж төрөлхийн тархины өвчтэй байсан гэх оноштой болж хувирсан  байдгийг хэлэх хэрэгтэй. Мөн охины өвчний түүхийг эмч нар зориудаар өөрчилсөн гэдгийг  ч өмгөөлөгч нар шүүх хурлын үеэр хэлж байсан. Тухайлбал “Охины зүрх хоёр удаа зогсч, цаг гаруй хэртээ амьсгал дэмжих эмчилгээ хийснээр амь насыг нь аварсан гэх өвчний түүхээс хуулсан Клиникийн захирал Ш.Энхтөрийн гарын үсэг бүхий бичилт, 2009 оны тавдугаар сарын 11-12-нд шилжих шөнийн 03-05 цагийн үед зүрх нь хоёр удаа зогссон”  гэсэн тэмдэглэлийг авч шинээр хуудас нааж, нэмэлт бичилт хийсэн байжээ. Түүнчлэн 2009 оны 12 дугаар сараас ЭНЭШТ-ийн эмч С.Очир, Б.Одгэрэл, Б.Гэрэлтуяа, С.Энхтуяа, н.Энхцолмон нар нь М.Номинжин охины өвчний түүхийг тус төвийн архиваас гурван удаа авсан байдаг.

Төгсгөлд нь хэлэхэд, эдгээр харамсалтай түүхүүд бол С.Ламбааг Эрүүл мэндийн сайдаар ажиллаж байхад болсон хэргүүдийн нэгээхэн хэсэг нь юм. Өшөө олон хүүхдийн цус нулимстай холбоотой сэтгэл урсан хэргүүдийн талаарх гашуун мэдээллүүд бий…

Б.Тамир

Эх сурвалж: Шуурхай.мн