Монголын эдийн засаг, тэрдундаа санхүүгийн зах зээлийн үндсэн гол тулгуур болж ирсэн банкны салбарын нөхцөл байдлын талаарх сүүлийн үеийн мэдээлэл гарчээ. Тэндээс үзэхэд  арилжааны банкуудын алдагдал 16 тэрбум төгрөгт хүрсэн мэдээ байна. Он гарсаар банкны салбар дөрөв дэх сардаа дараалан алдагдал хүлээж байгаа юм.  Арилжааны банкуудын нэгдсэн тайланд тусгаснаар нийт активын хэмжээ сүүлийн таван сар дараалан өсч, 22.2 их наяд төгрөгт тэнцжээ.

Гуравдугаар сард 5 хувийн хүүтэй ипотекийн зээл олгож эхэлснээр нийт зээлийн хэмжээ 11.5 их наяд төгрөгт хүрч, сүүлийн дөрвөн сарын дээд түвшинд хүрээд байсан бол дөрөвдүгээр сард зээл олголт эргэн буурч, 11.3 их наяд төгрөгт хүрчээ.

Мөн зээл олголт буурахын зэрэгцээ чанаргүй зээлийн хэмжээ нэмэгджээ. Ер нь бол чанаргүй зээлийн хэмжээ сүүлийн таван сар дараалан өссөн дүнтэй байгаа. Тэгвэл хамгийн сүүлийн мэдээллээс үзэхэд Монголбанкны тайланд тусгаснаар 833.9 тэрбум төгрөгийн чанаргүй зээл бүртгэгдсэн байна.

За харин арилжааны банкны нийт өөрийн хөрөнгийн хэмжээ сүүлийн нэг жилийн хугацаанд 182.2 орчим тэрбум төгрөгөөр нэмэгдсэн мэдээ байгаа юм. Монголбанкнаас арилжааны банкуудын хувь нийлүүлсэн хөрөнгийн доод хэмжээг 50 тэрбум төгрөг байхаар шинэчлэн тогтоосон билээ. Харин арилжааны банкуудын тухайд дээрх шаардлагыг 2017 оны 12 дугаар сарын 31-нээс өмнө ханган биелүүлэх ёстой. Монголд үйл ажиллагаа явуулж буй банкуудын  төлбөрийн чадвар, үйл ажиллагааны онцлог өөр өөр учраас тодорхой хугацаа олгосон хэрэг юм. Монголбанкнаас үзэхдээ банкуудын хувь нийлүүлсэн хөрөнгийн хэмжээг нэмэгдүүлснээр эдийн засгийн хүндрэлтэй нөхцөл байдалд банкны салбарын эрсдэл даах чадварыг сайжруулна гэсэн тооцоололтой юм билээ.

Дашрамд өгүүлэхэд, манай тухайд өдгөө 14 банк хэвийн хэмжээнд үйл ажиллагаа явуулж байгаа юм. Хоёр шатлалт банкны тогтолцоо бий болсноос хойшхи хугацаанд буюу 1990-2011 онд манай улсад нийт 31 банк байгуулагдаж байсан. Тэдгээрээс 15 банк нь дампуурч, 2 банк нь нэгдсэн байдаг юм.

Б.Тамир

Эх сурвалж: Шуурхай.мн