Эцэг эхчүүд болон асран хамгаалагч нарын хариуцлагагүй хараа хяналтгүй байдлаас болж бага насны хүүхэд халуун хоол, буцалсан усанд унаж түлэгдэх цаашлаад амиа алдах хэрэг гарсаар байна.

Өнгөрсөн долоо хоногт гэхэд ГССҮТ-д халуун хоол цайнд түлэгдэж гэмтэж очсон дөрвөн хүүхэд эмчлүүлж байна гэсэн мэдээлэл байсан. Тэгвэл өчигдөр гэхэд бага насны хүүхэд түлэгдэж эмнэлэгт хүргэгдэж ирээд түлэнхийн шархаа даалгүй нас барсан харамсалтай хэрэг гарчээ. Тодруулбал, БЗД-5 “Монелын … тоотоос тогоотой халуун хоолонд түлэгдсэн хүүхэд ГССҮТ-ийн түлэнхийн тасагт хүргэгдэн ирээд нас барлаа” гэсэн мэдээллийг өчигдөр авч шалгахад, тус тоотод оршин суух 2 настай эрэгтэй Ү нь халуун тогоотой хоолонд унаж түлэгдэн тус эмнэлэгт хүргэгдэн эмчлүүлж байгаад нас барсан хэргийг цагдаагийн байгууллагаас шалгаж байна. Ийнхүү он гарснаас хойш бага насны таван хүүхэд түлэгдэж амиа алдсан харамсалтай хэрэг гарсан байна.

Өнөөдрийн байдлаар ГССҮТ-ийн Түлэнхий болон Сэхээний тасаг ачаалалаа дийлэхгүй байдалд хүрчээ.

Тухайлбал, ихэвчлэн 0-5 насны хүүхдүүд хүнд, хөнгөн хэлбэрээр түлэгдэж ирэн эмчлүүлж байгаа нь олон ажээ. Ер нь тус төвийн ачаалал зургадугаар сард бүр илүү их нэмэгддэг гэдгийг эмч нар нь ярьж байгаа юм. Учир нь сургууль, цэцэрлэгийн хүүхдүүд амарсан үед ачаалал ихэсдэг байна. Яагаад гэвэл гэртээ байгаа хүүхдүүд халуун хоол, буцалсан усанд унаж түлэгдэж бэртэх хэрэг гардаг гэнэ.

Эцэг эхчүүд болон асран хамгаалагч нар нь хараа хяналтгүй бага насны хүүхдүүд гэрт нь орхих, хүүхдүүд тоглож наадаж байгаад халуун ус татах, хүүхдүүдийнхээ хөл гар хүрэх газар хоол ундаа хийж, усаа буцалгаж, халуун савтай цайгаа тавьсаны улмаас хүүхдээ түлж амь насаар нь хохироох хэрэг гарсаар байна. Бараг өдөр болгон л “хүүхэд түлэгдэж ирлээ” гэсэн дуудлага мэдээлэл холбогдох байгууллагуудад нь ирдэг байна.

Түлэгдэлтээс болж амиа алдсан хүүхдийн тоо ч сүүлийн жилүүдэд нэмэгдээд байна. “Хүүхэд түлэгдлээ, хүүхдээ түлчихлээ” гэсэн асуудал байнга гарч хэвлэл мэдээлэл, олон нийтийн хэрэгслээр хангалттай бичигдэж нийтлэгдэж байхад эцэг эхчүүд анхааралтай хариуцлагатай байгаачээ. Үнэндээ тэдний хэнэггүй буруутай байдлаас болж бага насны хүүхдүүд эрүүл мэнд амь насаараа хохироод байна. Хамгийн гол нь хариуцлага, хараа хяналтаа сайжруулаач ээ. Хүүхдийнхээ гар хөл хүрэхгүй газар, аюултай осолтой гэсэн бүхнээ тавьж “нууж” байхыг холбогдох газруудаас байнга анхааруулж сэрэмжлүүлсээр байна. Халуун хоол цай, буцалсан ус, халуун тогоо, халуун гал, баталгаагүй цахилгаан хэрэгсэл хэрэглэж ашиглаж байгаад хайртай үрсийнхээ эрүүл мэнд амь насанд битгий аюул учруулаач ээ эцэг эхчүүдээ….

О.Сайхан

Эх сурвалж: Шуурхай.мн