Улс төр дэх урвалт. Энэ үг бидний чихэнд ойр сонсогдож, нүдэнд харагдсаар 20 гаруй жил болжээ. Сонгууль бүрийн өмнө ямарваа нэг урвалт, улс төрийн намуудын өгөө авааны асуудал гарч ирдэг. Энэ удаад ч зарим нэг улстөрч үүнийг тойрч гарсангүй. УИХ-ын гишүүн Х.Болорчулуун, Ц.Даваасүрэн нар бие даагч сэтэртэй орж ирсэн ч сонгуулийн өмнө МАН-ын гишүүд болоод хувирчихсан. Үүнийгээ өөрсдийн итгэл үнэмшлийн дагуу хэмээн тайлбарлаж буй хэдий ч угтаа бол өөрсдийн ашиг сонирхлын төлөө гаргасан үйлдэл. Харин Г.Уянга, Л.Цог тэргүүтэй нөхөд намаасаа урваж, Тусгаар тогтнол, эв нэгдлийн нам байгуулан “өрх тусгаарласан”. Нам нь тэдэнд их ашгийг өгч чадахгүй байсан учир тэд ийм сонголт хийсэн биз.

Тэдний сонголтын тухай, урваж шарвалтын тухай яриа намжаагүй байтал МАХН-ын Ч.Улаан, Д.Тэрбишдагва нар төрхөмдөө буцсан. Анх Н.Энхбаяр шиг сайн хүн байхгүй гэж байсан тэдний хувьд Н.Энхбаяр шиг муу хүн үгүй болсон бололтой. Ямартай ч МАН-аас гарч, МАХН-ыг сонгосон дээрх эрхмүүд МАН руу урвав. Н.Энхбаярын хувьд өөрийг нь сонгуулийн хүнд үед орхиж явсан нөхөд урвагчид болж хувирч байгаа нь дамжиггүй байх.

Настай улстөрчид мөртлөө урваж шарвасаар энэ улс төрийн “гал тогоонд” ад үзэгдэж байх шиг. Сонгуулийн өмнө зөвхөн энэ урвалт явагддаг эд биш болохыг Д.Арвин тэргүүтэй хүмүүс харуулсан. МАН-аас олон жил улс төрд гарч ирсэн Д.Арвин хатагтайн хувьд АН-ыг сонгосон нь түүхэнд байгаагүй сонин сонголт байсан. Олон жилийн дараа намаа солино гэдэг хэр баргийн хүнээс гарахгүй алхам байх. Ялангуяа эмэгтэй хүний хувьд. Гэтэл тийм биш болохыг Д.Арвин өөрийн сонголтоороо харуулсан. Улс төрд энэ мэт урвалтууд их. Энэ бүгдийн цаана том эрх ашиг байнга байж байдаг. Бие хүнээ нэгдүгээрт тавьж, урвах сонголтыг хийдэг улстөрчдийн үе үүгээр дуусахгүй. Сонгуулийн дараа ч мөн сонирхолтой, олныг гайхшруулсан сонголт, шилжилт хөдөлгөөн хийддэг нь улстөрчдийн туршлага бидэнд бэлхнээ харуулж байна.

М.Төр

Цензургүй.мн