Их тэнгэрт бопсон АН-ын бүлгийн өргөтгөсөн хуралдаан УИХ дахь АН-ын бүлгийн дэд дарга С.Одонтуяагийн цахим хуудаснаа  бичсэн шиг эв нэгдлийн хурал болж чадаагүй ажээ.

Баярын өдрөө сонгон байж өнгөрсөн бямба гарагт Их тэнгэрт зарласан хурал уг нь чамгүй ирцтэй, фракц фракцын төлөөлөлтэйгөөр эхэлжээ. Цагтаа АН-ын туг нь болж явсан, одоо ч Үндэсний зөвлөлдөх хороондоо тэргүүлэх байр сууриа хадгалсаар буй “Алтангадас”-ынхан, өнгөрсөн сонгуулиар өдөлсөн ч өөдөө дүүлэх хүч нь улам л суларсаар буй “Шонхор”-ынхон, ардчиллын шанг таталцсан ч өдгөө “Шонхор”-ын нэгэн даль жигүүр мэт хүчгүйдсэн МоАХ-ныхон, үнэт зүйлгүй механик нэгдэл гэгдээд байгаа МоАН санаачилгынхан, МҮДН-ийнхэн гээд бүгд эвлэрлийн үгтэй урилгад “За” гэцгээн Их тэнгэрт цуглажээ.

Сонгууль хаяанд ирсэн энэ цагт ганцаарчилсан тоглолт хийхгүй, намынхаа эсрэг үг ярихгүй байя, гэхдээ фракцгүй нам гэсэн жүжиг тоглоод яахав, бодлогын асуудлуудаа фракцууд дээрээ зангидаад намын бүлэг, Гүйцэтгэх зөвпөлөөрөө шийдэж байя хэмээцгээсэн ч энэ хурлын гол дур нь Н.Алтанхуяг гишүүн, Х.Баттулга гишүүн нар байжээ. Х.Баттулга гишүүн уг хурал дээр “Надаас болж намын нэр хүнд унаад байгаа бол би бие даагаад нэр дэвшчихье” гээд Засгийн газрын Хэрэг эрхлэх газрын дарга С.Баярцогтод хандан “чамаас болж намын нэр хүнд навс унасан шүү. Чи сонгуульд нэр дэвших ч эрхгүй хүн. Нэр дэвшвэл чи бас бие даагаарай” гзжээ. Сүүлийн жилд өрнөж байгаа улс төрийн баривчилгааг Ерөнхийлөгчийн хүрээнийхэн тодруулбал, Ерөнхий сайд ч оролцож хийж байна гэсэн хардлага Их тэнгэр болсон хурлын үеэр ч гарсан байна. Харин өнгөрсөн долоо хоногт мэдэгдэл хийн намынхандаа төдийгүй улс төрийн хүрээнд сенсаац дэгдээсэн Н.Алтанхуяг гишүүн, “Монгол төрийг хэн бариад байгаа юм. Хүчнийхэн төрийн жолоог атгаж байна” гэсэн ширүүн үгийг намынхандаа хаяглажээ. Тэрбээр хуралдааныг дуусгалгүй орхин явсан аж. АН-даа нөлөө бүхий түүнгүйгээр хурлаас ямар нэгэн шийдвэр гаргаагүй тарцгаажээ. Гэхдээ ямар нэгэн улс төрийн акц, мэдэгдэл хийхээр бол эхлээд заавал намын бүлгийн хуралдаан дээрээ мэдэгдэнэ гэдэгт тохиролцсон гэнэ.

Гэсэн ч УИХ-ын гишүүн Х.Баттулгын хувийн компанийн туслахыг нь ням гаригт баривчилсан нь Их тэнгэрийн хуралдааныг тэр чигт нь үр дүнгүй болгожээ. Өчигдөр хуралдсан бүлгийн хурал дээрээ Х.Баттулга гишүүн, “Та нарын ойлголцол чинь энэ юм бол би хоёр сайдаа Засгийн газраас гаргана, засгийг унагаана” гэсэн аж. Хоёр сайд гэдэг нь Хүнс, хөдөө аж ахуйн сайд Р.Бурмаа, Зам, тээврийн сайд М.Зоригт нар бололтой. Бүлгийн хуралдааны эхэнд бүлэг дээрээ З.Энхболд, Н.Алтанхуяг, Х.Батгулга, Ч.Сайханбилэг нар мэдээлэл хийнэ хэмээн танилцуулсан ч Н.Алтанхуяг гишүүн, “Дээрэмчдийн бүлэглэлийнхэнтэй би хамтарч мэдээлэл хийхгүй” гээд хийгээгүй гэнэ. Тэгээд “Монгол төрийг хүчний байгууллагынхан жолоодоод байна гэж би Их тэнгэрт ч хэлсэн, түүнээс өмнө ч ярьдаг байсан. Та нар тоохгүй л байсан. Одоо батлагдаж байгаа биз” хэмээжээ. Түүнийг үг хэлсний дараа С.Эрдэнэ гишүүн “Би ч мөн хүчний байгууллагын машинд орж явсан хүн. Хэлмэгдүүлэлт хэтэрлээ” гэжээ.

Бүлгийн хуралдаанд оролцсон АН-ын ерөнхий нарийн бичгийн дарга Л.Эрхэмбаяр “Цагдаагийн байгууллагын даргыг ганцааранг нь солиод энэ бүх баривчилгаа, хэлмэгдүүлэлт зогсохгүй. Хүчний бүх байгууллагын удирдлагыг солих цаг нь болжээ” гэсэн санал гаргасан бол Ц.Оюунгэрэл гишүүн “Цагдаагийн байгууллагын даргыг сольё” гэсэн хэмээн эх сурвалж мэдээллээ. Эцэст нь намын дарга З.Энхболд бүх фракцын төлөөлөлтэй уулзахаар болоод хурал завсарлажээ.

О.АМАР  /ҮНДЭСНИЙ ШУУДАН/