УИХ дахь АН-ын бүлэг өнгөрсөн бямба гаригт Их тэнгэрийн аманд өргөтгөсөн хуралдаан хийж, хурал нь зургаан цаг үргэлжилсэн ч ямар нэгэн шийдэл шийдвэрт хүрч чадалгүй тарцгаажээ. АН-ынхан энэ хуралдаанаас ихээхэн зүйл буюу эв найрамдлыг хүсч хүлээж байсан ч бүх зүйл талаар өнгөрчээ. Гэтэл өнөөдөр өглөө хэвлэл мэдээллийн хэрэгслээр “АН-ынхан эвлэрсэн, үүсээд байгаа асуудлаа эцэслэн шийдвэрлэсэн” гэх мэт мэдээлэл гарсан нь андуу ташаа мэдээлэл бололтой.

Дээрх хуралд Төрийн тэргүүн Монголын эцэг Ц.Элбэгдоржийг хүрэлцэн ирнэ гэсэн мэдээлэл байсан ч тэрбээр ирээгүй байна. Харин түүний эсрэг турхирч эхэлсэн УИХ-ын гишүүн Н.Алтанхуяг хурлыг орхиж хаалгаа саван гарчээ.

Үүнийг сонссон Ерөнхийлөгч “Би Алтанхуягтай уулзах гэж байсан юм. Тэрбээр явчихсан бол очих шаардлага надад байхгүй. Наад асуудлаа хурдан шийд” гэж хэлээд хуралд очоогүй гэнэ. Бүлгийн хуралдаан халуухан ширүүхэн болж, зарим гишүүд хэлээрээ ойлголцохгүй, нударга зөрүүлцэж зодолдсон гэх эх сурвалжийн мэдээлэл байна. Нам дотроо, бүр бүлэг уутанд хийсэн эвэр шиг ийший тийшээ харцгаасан нөхдүүд яаж эвлэлдэн нэгдэж чадах юм бэ. Хий хоосон бие биенээ “хутгалж” шантаачлахаас өөрийг мэдэхгүй, хийрхэхээс өөрийг мэддэггүй хүмүүстэй хэн учир зүйгээ ололцох юм бэ.

Хуралдаанаар Н.Алтанхуяг, Х.Баттулга нарыг хийсэн мэдэгдлээ тайлбарлахыг шаардсан ч тэд эсэргүүцэж, нэг нь бүр хурлыг орхин явсан нь бусададаа онцгүй санагджээ. Тиймээс үүсээд байгаа асуудлаа бүлэг дотроо ярилцаж, эв зүйгээ ололцохоор тохиролцсон ч тохироонд хүрч чадаагүй нь харамсалтай юм. Хурлын үеэр хэвлэл мэдээллийн хэрэгслийн гол баатар болоод байгаа Женко Х.Баттулга өөрийн хоёр хүнээ хуулийн байгууллагад баривчлуулан саатуулсан талаараа гомдолтой байгаагаа дуулгажээ. Харин өнөөдрийн бүлгийн хуралдаан дээр тэрбээр “Өнгөрсөн бямба гаригт асуудлаа ярьж шийдсэн гэж бодож байлаа. Гэтэл дахиад хоёр хүнийг минь баривчилсан байна. Ийм эвлэрэл гэж байдаггүй юмаа.

Хэрвээ асуудлаа шийдвэрлэхгүй бол би хоёр гишүүнээ татан авч Засгийг чинь унагаана шүү. Засагтай чинь хариуцлага тооцно” гэж заналхийлэн дарамталжээ. Ийнхүү сонгуулийн чимээ ойртох тусам нам намынхаа хүн дээр улстөрийн тоглолтоо бохир аргаар хийхээ болъя гэдгээ тэд хоорондоо ярилцсан ч асуудлаа бүрэн ойлгож чадаагүй юм билээ гэдгийг бүлгийн гишүүд хэлж байгаа юм. Үнэнийг хэлэхэд сонгууль дөхөөд ирэхээр хуулийн байгууллагаас зохиомол хэрэгт хэн нэгнийг гүтгэж гүжирдэж шалгадаг.

Сонгууль дууссаны маргаашнаас эхлээд нөгөөх эрүүгийн хэргүүд юу ч биш болоод замхраад алга болдог жишиг тогтоод удаж байна. Ийм л замаар жишгээр сонгууль угтаж, намынхан дотроо хууль бус баривчилгаа явуулж эхэлсэн гэж зарим нэгэн гишүүн хардаад байгаа аж. Тиймээс хууль хүчний байгууллага аливаа асуудалд хандахдаа болгоомжтой байх ёстой хэмээн АН-ын бүлгийн гишүүд үзэж байна. Ийнхүү АН-ын бүлгийнхэн дотроо эв зүйгээ олоогүй дээр эсрэг тэсрэг байр суурьтай болсон Х.Баттулгын эргэн тойрон дахь хүмүүсийг ээлж дараалан баривчилж эхэлсэн бөгөөд өнөөдөр гэхэд түүний өрөө юу тусгайгийнхан дайрч давшилж орсон гэх мэдээлэл байна.

О.Сайхан

Zaluu.com