АН-ын сайд нарын орон тоон дээр орны сайдыг нь томилж чадахгүй нэлээд хэдэн хоногийн нүүрийг МАН-ынхан үзлээ. Өчигдөр л нэг асуудлаа шийдэх замдаа орж байх шиг байна. Энэ нь сайд болох гэсэн хүсэлтэй дийлдэшгүй их амбицтай гишүүдтэй нь холбоотойгоор удсан билээ. Хүн бүр л сайд, дэд сайд болчих гээд үзээд байгаа. Ийнхүү албан тушаалын бужигнаан үүссэн нь ах намынхны үндсэн хоббиг хөдөлгөчих шиг бололтой. Одоо онгорхой байгаа улс төрийн албан тушаалуудаасаа гадна энд тэндэхийн төрийн албан хаагчийн албан тушаал руу ч шуналтах болсон сураг гарах болов. Засгийн газрын хэрэг эрхлэх газрын дарга Ч.Хүрэлбаатар ойрын өдрүүдэд албан тушаалаас нь мулталж суудлыг нь авах хүмүүсийнхээ жагсаалтыг гаргажээ.

Ч.Хүрэлбаатар сайдын хар жагсаалтад агентлагийн дарга, дэд дарга нараас эхлээд аймаг дүүргийн харьяаны дарга нарын нэр ч багтжээ. Гэхдээ тэдгээр хүмүүс нь АН-ын угшилтай хүмүүс байгаад нь асуудлын гол оршиж байгаа юм. Уг нь сайд, дэд сайд бол улс төрийн албан тушаал, харин Төрийн нарийн бичгийн даргаас эхлээд бусад нь төрийн албан хаагч гэдэг нь 2008 оны нэгдүгээр сарын 1-нээс хэрэгжиж эхэлсэн Төрийн албаны хуульд нарийн заагдсан байгаа. Хуульд төрийн албан тушаалыг төрийн, улс төрийн, төрийн захиргааны, төрийн тусгай, төрийн үйлчилгээний гэж ангилна гээд тодорхой заагаад өгчихсөн байдаг. Төрийн албыг улс төржүүлэхээс сэргийлж гаргасан уг хууль нь бас ч гэж үр өгөөжөө өгч, хүмүүс нам эсвэл төрийн албанд байхаа шийдсэн торгон шийдвэрийг гаргаж байсан. Олон хүн намын гишүүнчлэлээсээ гарч, бас цөөнгүй хүмүүс төрийн албаа өгч нам дээрээ очсоны нэг нь МАН-ын нарийн бичгийн дарга Я.Содбаатар байсан. Өөрөөр хэлбэл, төрийн албаа сонгосон хүмүүс ямар нэгэн намын харьяалал байхгүй болсон. Гэтэл одоо хуучин АН-д байсан хүмүүсийг угшил нь “дайсных” гээд зайлуулах гэж байна. Хэдийгээр АН хамтарсан Засгийн газраас гарсан нь үнэн боловч төрийн албан хаагчдыг угшлаар нь хөөж хална гэвэл дэндүү туйлширсан хэрэг болох биз. Тэдний дийлэнх нь хамтарсан Засгийн газраас ч өмнө ажиллаж байсан хүмүүс. Гэвч МАН-ын Засгийн газрынхан УИХ-ын гишүүдийнхээ шаардлагаар гэх нэрийн дор ийм арга хэмжээ авахаар жагсаалт хүртэл гаргажээ. Тэр ч бүү хэл харьяа яам, дүүрэг, аймгийн засаг дарга нарт нь оны өмнө хийдэг үр дүнгийн гэрээг нь хийхгүй хүлээзнэж байх үүрэг өгсөн гэнэ. Түүгээр ч үл барам ямар нэгэн алдаа эндэгдэл хайж бэлдэж байх үүргийг ч өгсөн сураг байна. Өөрөөр хэлбэл, Төрийн албаны хуулийн 23 дугаар зүйл заалтаар ажлын байрны зорилго тодорхойлолтод бичсэн үүргээ биелүүлээгүй гэдгээр л АН-ынхныг явуулахаар төлөвлөж байгаа бололтой. Гэвч тэд төрийн албаны хуулийн дагуу гишүүнчлэлээсээ татгалзаж, төрийн албандаа зүтгээд олон жил болсон гэдгийг эрх мэдэлтнүүд умартсан бололтой. Хамгийн сүүлд Шударга бус өрсөлдөөнийг зохицуулах газрын дарга Д.Мандахад арга хэмжээ авахдаа дэд дарга н.Доржпалам гэдэг нөхрийг халчихсан. Учир нь тэр хуучин АН-д байжээ. МАН-ынхны улстөржсөн энэ алхам нь ч хол явахгүй байлгүй дээ. Төрийн албаны зөвлөл энэ тал дээр анхаарч, гишүүнчлэлгүй намын тухай санааг гаргаж байсан төрийн тэргүүн ч үүнийг анхааралдаа авах биз. Хамгийн гол нь нэр хүнд нь түүхэндээ байгаагүйгээр дорд орсон МАН-ын хувьд төрийн албан хаагчдаараа оролдвол сонгууль дөхсөн энэ өдрүүдэд тэдэнд итгэх хүмүүс цөөхөн болох байх даа.

Э.ЭРЭЛ