Монгол Улсын эдийн засаг ямар байна вэ? энэ талаар төр хувийн хэвшлийнхэн, улстөрчид, эдийн засагчид бүгд цуглан ярилцаж эхэллээ. Жил бүр Монголын эдийн засгийн чуулганыг зохион байгуулдаг. Энэ жилийн хувьд сорилт, сургамж, шийдэл гэсэн үндсэн 3 төрөлд үндэслэн ярилцах аж. Энэ үеэр өөр юу ч биш зөвхөн эдийн засгийг сэргээж, сайжруулахын төлөө л ажиллана гэж амласан хүн бол Монгол Улсын Ерөнхий сайд Ч.Сайханбилэг. Тэр өнөөдөр өөрийгөө өмгөөлсөн үг хэллээ. Эдийн засгийг сэргээхийн тулд эхлээд хууль эрх зүйн орчноо сайжруулсан. Мөн татварын орчныг ил тод болгосон юм. Нуусан хөрөнгийг ил болгож, 6 орчим тэрбум төгрөгийг улсын төсөвт оруулсан. Төр шилэн болсон. Эдгээр нь Засгийн газраас хэрэгжүүлж эхэлж буй томоохон ажлуудын хэсэг нь.

Засгийн газар Оюутолгой, Тавантолгойг урагш явуулъя гэсэн ч улстөржиж хөдөлгөсөнгүй. Оюутолгойг явуулсан бол одоогийнхоос хоёр дахин дээр байх байлаа гэж Ерөнхий сайд хэлэв. Нүүрсний үнэ хаданд гарч байсан 2012 онд Тавантолгойг эдийн засгийн эргэлтэд оруулсан бол байдал өөр байх байлаа. Эдгээр ажлуудыг эхлүүлэх боломжийг улстөрчид харамсалтай нь олгосонгүй хэмээн өнөөдөр ярьж сууна. Тэрбээр өөрийнхөө засаг авч явааг өмөөрч, өмнөх засгийн тэргүүн дээрх ажлуудыг явуулж чадаагүй нь ийнхүү эдийн засаг ийм хүртлээ хямрахад хүргэсэн гэх утгыг тэр хэлж орхив.

Ч.Сайханбилэг эдийн засаг гэх үгийг гурван удаа хэлж гарч ирсэн. Түүнийг сайд болсноос хойш эдийн засгийн хямрал өөрчлөгдөөгүй ч, хууль эрх зүйн орчин тодорхой хэмжээгээр өөрчлөгдсөн. Мөн хэтэрхий их улстөржилтөөс болж ажил явахгүй байгаа болохыг тэр тодотгосон. Энэ нь Ерөнхий сайд Ч.Сайханбилэгийн өөрийгөө өмөөрөх шалтгаан нь аж.

Х.Наран

Эх сурвалж: Цензургүй.мн