С.САРУУЛ

Г.Түвшинжаргалын нөхөр Н. Мөнхбаатар хорих 461-дүгээр анги дээр эхнэртэйгээ уулзахаар очжээ. Түүнээс цөөн асуултад хариулт авлаа.

-Та хамгийн сүүлд хэзээ эхнэртэйгээ уулзсан бэ. Өлсгөлөн зарласан гэсэн. Биеийн байдал нь хэр байна вэ?

-Би өмнөх хоёр дахь өдөр /2016.03.22/ уулзсан. Тэгэхэд нэг ч удаа байцаалт аваагүй их хэцүү байна гэж байсан. Хөхүүл хүн өлсгөлөн зарлачихаар бие нь муудна. Хэрэв энэ чигээрээ өлсгөлөн зарлаж байгаад цаашид ямар нэг муу зүйл боллоо гэхэд хэн хариуцах юм. Энэ хүн үзэл бодолдоо тууштай учраас цаашид хэчнээн ч хоногоор өлсөхийг би мэдэхгүй байна. Хамгийн дотны хүн болох би мэдээллээр ийм хомс байхад ямар нэг зүйл боллоо гэхэд би мэдэхгүй байж байх нь. Надад хөл дээрээ зогсоход ч хэцүү байна.

-Өнөөдөр ар гэрийнхэнтэй нь уулзуулна гээд Л.Эрдэнэчимэг гишүүнийг уулзуулсангүй?

-Уг нь өнөөдөр /2016.03.29/ би эргэлтийн бичигтэй ирсэн. Гэтэл өлсгөлөн зарласан учраас уулзахгүй гэсэн. Өлсгөлөн зарлаад 53 гаруй цаг болсон учраас толгой нь эргээд босч явахад хэцүү учраас уулзахгүй гэсэн. Хууль хяналтын байгууллага хүнийг хүн гэдэг талаас нь харж үзээсэй гэж хэлмээр байна. Маргааш үргэлжлүүлэн хорих эсэхийг шийднэ.

-Хүүхэдтэйгээ хэдэн удаа уулзаж хөхүүлсэн бэ?

-Хүүхдээ шилний цаанаас нэг удаа харсан. Түүнээс хөхүүлсэн зүйл байхгүй. Угаасаа хүүхдийг нэвтрүүлэхгүй, уулзуулахгүй байгаа. Хүүхэд шөнө унтахгүй уйлж байна. Би шөнө нь хүүхэдтэйгээ ноцолдоод, өдөр нь эхнэртэйгээ уулзах гээд хорих анги дээр өнжиж байна.

Эх сурвалж: www.polit.mn