МАХН-ын дарга Н.Энхбаяраас элэг буруулж, урвасан намын нөхдүүд нь намаа болон даргыгаа тун чиг эвгүй байдалд оруулаад эхэлсэн гэж ойлгож болно. Намынхаа төлөө үнэнчээр зүтгэж, ажиллана хэмээн тангараг өргөсөн албан тушаалтнууд нь өнөөдөр авлигын хэргээр хуулийн байгууллагад шалгагдахаас гадна, зарим нэг нь асуудалд орооцолдохоосоо өмнө намаасаа гарч хувьдаа зам мөрөө хөөж эхлэв.

Тиймдээ ч намын дарга Н.Энхбаярын өмгөөлөгч Э.Эрдэнэжамъян өчигдөр мэдээлэл хийж, Л.Цог, Г.Шийлэгдамба, С.Дашдондог нарыг намаасаа урвасан урвагч шулам нар гэж хэлээд даргыгаа өрөвдөж матрын нулимс унагааж жүжиглэв. Үнэндээ намын дарга Н.Энхбаярын төлөө зүтгэх, сэтгэл зүрхээ зориулах хүмүүс нь өөрөөс нь холдож байгаа нь үнэн юм. Намдаа болон даргадаа хайртай хэмээн хайр зарлаж, хавирга сүвээнд нь наалдаж явсан нөхдүүд нь нүүр буруулахаас гадна намдаа хандивлаж явсан их бага хэмжээтэй мөнгөө олж авахын тулд хуулийн байгууллагад ч хандсан тохиолдол бий.

Тэдний нэг нь Монгол Улсын иргэн С.Дашдондог. Тэрбээр намдаа 500 сая төгрөгийн хандив өгч байжээ. Харин мөнгөө буцааж авах гэж нэхээд өгөхгүй болохоор нь АТГ-т хандаж өргөдөл гаргаснаа өөрийн цахим хуудсаараа олон нийтэд зарлачихсан байгаа юм. Тодруулбал, Худалдан авах ажиллагааны газрын дарга асан С.Дашдондог гэх энэ нөхөр МАХН-ын дарга Н.Энхбаярт намын санхүүжилт нэрээр 500 сая төгрөгийг өгчээ. Тэр мөнгийг өгснийхөө дараа буцаан авах хүсэлт гаргахад нь Н.Энхбаяр өгөхгүй гэж хэлээд “Уг асуудлаар АТГ-т ханд” /2015.9.23-ны өдөр/ гэж хэлжээ. Ийм учраас С.Дашдондог МАХН-д өгсөн 500 сая төгрөгөө нэхэмжилж АТГ-т өргөдөл өгсөн аж.

С.Дашдондог энэ тухайгаа өөрийн нүүр номондоо “Г.Шийлэгдамба болон П.Цогтбаатар нар шиг шоронд орох, над шиг бүх насан туршдаа үнэнчээр зүтгэж босгосон нэр хүнд- капиталаа Н.Энхбаяр даргад завшуулчих вий гэж болгоомжлох үүднээс залуус дүү нартаа анхааралтай хандахыг ахмад хүний хувьд зөвлөж байна” гэсэн пост бичсэн нь олны анхаарлыг яах аргагүй татсан юм. Харин Н.Энхбаярын өмгөөлөгч, хуульч Э.Эрдэнэжамъян ярихдаа “С.Дашдондог гэж мэдрэл муутай хүн хачин юм яриад яваад байгаа. Өөрөө сонгуулийн үеэр МАХН-ын үйл ажиллагааг дэмжинэ гээд хандив өгч явсан.

Өөрөө Булган аймагт нэр дэвшихдээ баахан мөнгө зарцуулсан юм шиг байгаа. Тэгээд одоо намд илүү их хандив өгсөн учраас буцааж мөнгөө авъя ч гэх шиг. Намын албан тушаалд томилогдох гэтэл намайг дэмжээгүй юмаа ч гэх шиг сонин юм ярьсан байгаа. Хэрвээ албан тушаалд томилсон бол 500 сая төгрөгөө нэхэхгүй байх нь. Яг үнэндээ ийм хүнийг шантаажчин гэж хэлнэ. Тэрнээс биш сонгуульд нэр дэвшүүлэх бололцоог нь олгосон.

Хамтдаа зүтгэе гэсэн хүмүүс шантаажчин биш юмаа. Харин тодорхой хэмжээний мөнгө намд зарцуулчихаад намайг албан тушаалд тавь гэх нь шантааж. Үнэндээ Худалдан авах ажиллагааны дэд даргаар томилсон шүү дээ. Дараа нь дахиад сайд болъё гэж шантаажилсан. Тэгэхээр нь тавиагүй болохоор мөнгөө нэхэж шантаажилж байгаа нь энэ юмуу даа” гэв.

О.Сайхан

Zaluu.com