Байгалийн онц аюулт үзэгдэлтэй холбогдуулан Онцгой байдлын газраас бэлэн байдал зарлан ажилласны үр дүнд өнгөрсөн хоёр хоногт болсон байгалийн онц аюултай үзэгдлийг хохирол багатай даван гарчээ.  Баруун Сибирээс орж ирсэн хүйтэн урсгалын нөлөөгөөр цасаар шуурсаны улмаас хаагдсан  зарим замын хөдөлгөөнийг  өнөөдөр өглөөний 10:00 цагаас  эхлэн нээсэн байна. Учир нь Баруун Сибирийн хүйтэн агаарын урсгал энэ сарын 5-7-ын өдрүүдэд манай улсын төвийн болон зүүн бүсийн нутгийг дайран өнгөрөх тул цаг агаар удахгүй тогтворжих аж.

Үндсэндээ Баруун Сибирээс орж ирсэн агаарын хүйтэн урсгал Монгол орны нутаг дэвсгэрээр 3-7-ны өдрүүдэд дайран өнгөрч 8-ны өдрөөс эргэн дулаарч эхлэх юм байна. Гэхдээ саяхан орсон их цас хайлж, шар усны үерийн гамшиг нүүрлэж болзошгүйг холбогдох албаныхан анхааруулж байна.