Зуун ямаанд жаран ухна гэгчээр гурван сая гаруйхан хүн амтай манай улс өнөөдөр 20 гаруй улс төрийн намтай болоод байна. Улс төрийн намууд нь төр засгийг тогтвортой, чадварлаг байлгаж, улс орноо хөгжүүлэх орчин цагийн даацтай, чансаатай бодлого боловсруулан хэрэгжүүлж чадаж байна уу гэвэл үгүй. Энэ тухай эрдэмтэн мэргэд амаа чилтэл ярьдаг боловч эрх баригч намуудаасаа эхлээд аль нь ч тоох янзгүй байгаа юм. Улс төрийн буюу өндөр түвшингийн авлигын сүлжээг улс төрийн намуудаар дамжин төр засгийн томоохон албан тушаалд очсон бизнесийн бүлэглэлүүд гартаа атган, хөгжилд нэмэр болохоосоо нэрмээс учруулах нь их болжээ. Тухайлбал, Таван толгой, Оюу толгой, шинэ төмөр зам, цахилгаан станц зэрэг олон том төслүүд гацаанд орж, хөгжлийн маш их боломжийг ардаа орхисон он жилүүдийг монголчууд туулан өнгөрч буйг гадаад, дотоодын судлаачид сэтгэл зовинон бичиж байна. Харин сонгууль ойртоод ирэхээр улс төрийн томоохон намууд нь хоорондоо нэгдэж нийлэх, сонгуульд ялалт байгуулахын тулд хуулийн зарим шинэчлэлүүдээ түр хойш тавиад сонгогчдод таалагдах ажлаа амжуулахыг хүсч байгаа аж. Намууд нэгдэх асуудал дээр урьдын угшил нэгтэй МАН, МАХН хоёр нэгдэх тухай яригдаж байлаа. Гэвч саяхан МАХН-ын дарга Н.Энхбаяр нь “Хамтарч болно, харин нэгдэж яавч болохгүй” гэсэн хариу өгчээ. Тиймээс энэ хоёр нам нэгдэж нийлэх талаар ойрын жилүүдэд саналтгүй болов бололтой. Тэгвэл АН-ын зүгээс ИЗНН-тай нэгдэх талаар ярилцаад удирдлагынхаа хүрээнд үндсэндээ тохиролцсон боловч ИЗНН-ын аймаг, дүүрэгт ажилладаг анхан шатны нэгжүүд нь “Үгүй” хэмээн гүрийхээр шийджээ. Нийслэлийн зургаан дүүрэгт тус намын гишүүд нь АН-тай нэгдэх эсэхээ ярилцаад тийнхүү “Нэгдэхгүй” гэсэн хариу барьж байна. Уг нь үзэл баримтлалаар ойролцоо намууд хоорондоо нэгдэж нийлэн хүчээ зузаатгаад, дүрэм журмаа шинэчлээд явахад болохгүй зүйл үгүй баймаар юм.

Б.Баяр

Эх сурвалж: Шуурхай.мн