ХҮН-ын дотоод зөрчил маргаан эцэслэн шийдэгдээгүй байна. Тус намын дарга С.Ганбаатарыг өчигдөр буюу энэ сарын 2-нд огцруулсан гэх мэдээлэл цацагдсан юм. Гэвч Хөдөлмөрийн үндэсний намын Төв хорооны 56 гишүүний 10 орчим хувь нь цуглаж хуралдан ийм шийдвэр гаргасан тул хүчингүй хэмээн Төв хорооны гишүүдийнх нь дийлэнх олонх  үзжээ. Энэ асуудлаар намын дарга С.Ганбаатар  тушаал гарган  Төв хороогоо хуралдуулах хүртэл намынхаа Хариуцлагын ерөнхий хорооны бүрэн эрхийг түдгэлзүүлсэн байна. ХҮН-ын Төв хороо нь өнөөдөр хуралдаж сүүлийн үед намын дотоод амьдралд болж буй зөрчил маргааны асуудлаа эцэслэн шийдэхээр болжээ. С.Ганбаатар нар урьд нь намын Ерөнхий нарийн бичгийн дарга Т.Доржхандыг огцруулах шийдвэр гаргаж байсан нь ийнхүү дотоод будлиан үүсэх шалтаг шалтгаан боллоо гэж зарим гишүүд нь дүгнэж байгаа аж. Өнөөдрийн хурлаар тус нам дотоод зөрчлөө хэрхэн шийдсэн талаар эргэж мэдээлэх болно.

Б.Баяр   

Эх сурвалж: Шуурхай.мн