С.Зориг агсны амийг зэрлэгээр хөнөөсөн хэрэг илрэхгүй 18 дахь жилийнхээ нүүрийг узэж байна. Энэ хэргийн ганц амьд гэрч гэгддэг Б.Булган харин Төв аймгийн шоронд хоёр дахь удаагаа саатуулагдан шалгагдаж эхэлснээс хойш гурван сар гаруй хугацаа өнгөрч буй аж. Хэргийг мөрдөн шалгах ажиллагаа онцгой нууцлалтай тул тодорхой мэдээллийг ажлын хэсгийнхний хэн нь ч олон нийтэд хүргэхгүй байгаа юм. Хууль зүйн сайд Д.Дорлигжав хүртэл уг хэргийг мөрдөх ажиллагаа юу болоод байгааг мэдэхгүй гэж байна. Харин Булганы ээж Байгаль гуай саяхан хэвлэлд өгсөн ярилцлагадаа  “Охиныг минь хэлмэгдүүлэх вий гэж санаа зовж байна. Өмгөөлөгчөөр нь манай садангийн нэг хүн ажиллаж байгаа. Харамсалтай нь охинтой минь өмгөөлөгч  нь уулзаж чадахгүй байна. Ингэж болохгүй шүү дээ. Охин минь ямар ч нөхцөлд өмгөөлүүлэх эрхээ эдлэх ёстой” гэсэн байлаа. Мөн тэрбээр Ерөнхийлөгч болон Хүний эрхийн үндэсний комисс, УИХ-ын Өргөдлийн байнгын хороо зэрэгт ханджээ. Үүнийх нь дагуу Хүний эрхийн комиссынхон Б.Булганы эрх зөрчигдсөн эсэхийг шалгаад  “Хүний эрх зөрчилдөөгүй байна” гэж дүгнэсэн байна.  Түүнчлэн УИХ-ын Өргөдлийн байнгын хорооны дарга Ж.Батзандан Төв аймгийн шоронд урьдчилан хоригдож буй Б.Булгантай өчигдөр очиж уулзжээ. Энэ үеэр Б.Булган түүнд өмгөөлөгчтэйгөө байнга уулзаж байх хэрэгтэй байна. Үүнд анхаарч холбогдох хүмүүст нь хэлж өгнө үү” гэсэн аж. Ж.Батзандангийн хэлж буйгаар бол одоохондоо түүний биеийн байдал сайн байгаа ажээ.

Б.Баяр

Эх сурвалж: Шуурхай.мн