Та минь ээ, нэг сонин юм дуулгахад, дуучин ч бил үү, жүжигчин ч бил үү нэг хүүхэн УИХ-ын гушүүн болох хүсэлдээ хөтлөгдөн, нэр дэвшихээр болсон сурагтай. Сүүлийн үед цахим ертөнцөөр л нэг дуулиан, шуугиан. Энэ талаар янз бүрээр л ярьж байна. Сайхан бүсгүй, УИХ-д суувал эрэгтэй гишүүдэд хэрэгтэй. Тэр сайд ингэнэ, энэ гишүүн тэгнэ гээд л янз бүрээр дөвийлгөж байна. Ер нь бол түүнд нэр дэвших эрх бий. Угаасаа Монгол Улсын Үндсэн хуульд сонгох, сонгогдох эрхтэй гээд заагаад өгчихсөн байгаа. Тийм болохоор дуучин нь нэр дэвшинэ үү, жүжигчин нь сонгуульд өрсөлдөнө үү ямар хамаа байна аа. Бүгдэд нь эрх бий. Бүр архинд ороод, гудамжинд гарчихсан нөхөр ч чадаж байвал УИХ-д нэр дэвшиж болно шүү дээ. Монгол Улсын иргэн л юм бол тэр эрхийг нь Үндсэн хуулиар нээгээд егчихсөн байна. Ер нь бүгдээрээ л нэр дэвшье, хамаа алга. Тэрийг сонгосон, ингэж хулхидууллаа. Энэ намынхан төр самарч байна, ингэж ч мөрийн хөтөлбөрөө биелүүлсэнгүй. Одоо сонгууль өгөхөө больё гээд үсчиж өгдөг. Тэгж байхаар бүгдээрээ нэр дэвшээд, бие биетэйгээ өрсөлдөөд үзье. Аз нь байгаад сонгогдчихвол гишүүн байх, улс эх орны төлөө ажиллах ямар байдгийг мэдэрье. Олон хүн азаар сонгогдоод, бүр сайд болтлоо яваад байна. Тийм байхад тэднээс дор азтай л байв гэж.

Ер нь УИХ-ын гишүүн байхад мэдлэгтэй, чадвартай, баян, сэтгэлтэй байх ч хэрэг алга. Зүгээр л азтай байхад боллоо. Гишүүн болчихвол байргүй байсан ч төрөөс орон сууц өгчихнө. Тэгээд жаахан сэргэлэн байвал мөнгөтэй, төгрөгтэй, унаа тэрэгтэй болчихно. Угаасаа азаар гишүүн болсон нөхдүүд тийм байдгийг нь жишээгээр харуулчихсан юм чинь. Бусад нь ч тэр замаар л явна шүү дээ, хамаа алга. За тэгээд, УИХ-ын гишүүн байхад дүрэм, журамд баригдаад байхгүй. Чуулганы хуралдаанд суухгүй байлаа гээд гишүүн биш болчихгүй, цалингаа бүтэн авна. Оюутан, сурагч, ажилтныг бол хичээл, ажлаа таслаад байвал сургуулиас нь юм уу ажлаас нь хөөнө, хална. Харин гишүүнийг тэгэх эрх хэнд ч байхгүй. Дуучин хүн гишүүн болчихвол чуулганд суухгүй, өрөөндөө студийн тоног төхөөрөмж тавьчихаад, дуугаа бэлтгээд байж болно.Шинэ жилээр халтуур хийсэн ч яадаг юм. Ердөө л гишүүн болсон болохоос биш ямар дуучин байхаа больсон биш. Улс орны төлөө хууль санаачлаад байх ч хэрэггүй. Угаасаа дөрвөн жил, цаашлаад найман жил суучихаад ганц ч хууль санаачлаагүй, компанийнхаа ажлыг хийгээд явж байгаа бизнесмэн байж л байна, тэр дотор. Түүн шиг л ажиллавал болно биз дээ. Ер нь өглөө Төрийн ордонд ирж үзэгдсэн болчихоод, өдөржин өрөөндөө “Candy crush” тоглоод, орой 17:00 цагаас тараад харьчихсан ч яадаг юм. Чуулган, байнгын хорооны хуралд суух ч шаардаага байхгүй. Хувийнхаа ажлыг амжуулаад л явж байгаад дөрвөн жилийг үдчихэд болно. УИХ-ын гшпүүний ажил гэдэг ийм л амархан. Тийм байхад хэн нь ч нэр дэвшсэн ер нь яадаг юм. Дуучин, зурхайч, жагсагч ч байсан хамаа алга. Тэгээд ч тэдэнд УИХ-ын гишүүний ажил ийм амархан харагдаад байгаа болохоор дуулах, жүжиглэх, лекц уншихын хажуугаар хийгээд байж болно гэж бодохгүй юу. Тийм болохоор тэднийг буруутгах арга үнэндээ алга. Бидч өөрсдөө нэр дэвшиж болно. Үндсэн хуулиар олгосон эрх байхад хамаа юу байна. Зүгээр л азаа үз.