Эрүүл мэндийн сайд Г.Шийлэгдамба авлига авсан хэргээр АТГ-т байцаагдаж байгаа билээ. Улмаар биеийн байдал тааруу гэх шалтгаанаар батлан даалтад гарч суллагдаад байгаа. Тэгвэл сүүлийн үед Г.Шийлэгдамбын олон нийтэд ил захидал бичсэн нь нэлээдгүй шуугиан тариад байгаа. Уг захианд бичсэнээр бол Г.Шийлэгдамба нь Ерөнхий сайдад Эрүүл мэндийн сайдаас огцоръё гэсэн өргөдлийг өөрийн хүсэл эрмэлзлээр бичээгүйгээс гадна өрөөндөө “гардуулсан” 50 мянган ам.долларыг намын дарга Н.Энхбаяртаа өгсөн. Тэр ч байтугай хэрэв азгүйтэж баривчлагдаагүй бол нэмж 120 мянган ам.долларыг нэмж өгөх гэж байсан гэнэ. Харин үүнд МАХН-ын дарга Н.Энхбаяр “Бадарчийн Жаргалмаа” нэвтрүүлэгт оролцох үеэрээ ам нээжээ. Тэрээр  “Г.Шийлэгдамбын захиа хуурамч байх. Хэрэв өөрийнх нь байвал маш их сэтгэл санааны дарамтанд орсон байж болзошгүй. Зарим үг хэллэг нь түүний хэрэглэх үг биш байсан. Би Г.Шийлэгдамбаас нэг ч төгрөг аваагүй” хэмээж байсан. Чухам үнэн худал нь аль болох нь баталгаагүй ч АТГ-аас МАХН-ын ерөнхий нягтлан н.Цэцэгмааг өнгөрсөн баасан гаригт байцаалт авсан байна. Энэн Г.Шийлэгдамбийн ил захидалтай холбоотой байцаасан байж болзошгүй хэмээн эх сурвалжууд мэдээллэж байна. Мөн МАХН-ын хэд хэдэн өрөөг лацдаж битүүмжилсэн байдалтай байгаа гэнэ.

Эх сурвалж: Шуурхай.мн