Бүлгийн даргаа   гадаад оронд томилолтоор явсан хойгуур өөр байнгын хороонд шилжүүлэх хүсэлт тавьж, АН-аас ОК үнэлгээ авсан З.Баянсэлэнгэ гишүүн барьцаа улам сунгах ажлуудаа эрчимжүүлж буй.  Тэрээр “Шударга ёс” эвслийн бүлгийн дэд даргын хувиар ИЗНН-тай хамтарч ажиллах хүсэлт хүргүүлэхдээ танай намын дуу  хоолой төдийлөн сайн сонсогдохгүй байгаа тул манай бүлэгтэй нэгдэн асуудалд нэг байр сууринаас хандаж байя гэсэн ерөнхий утгатай бичиг илгээсэн юм.

Гэвч үнэн хэрэгтэй сүүлийн үед З.Баясэлэнгийн дуу хоолой олон нийтэд төдийлөн итгэл үнэмшилтэй сонсогдохоо больсон. Голомт банктай  байрны урьдчилгаа төлбөрийг 10 хувь болгох санамж бичиг байгуулснаа эцсийн байдлаар гэрээ хийсэн мэт зарлаж,  ипотекийн зээлийн хүүг тав болсныг хүртэл засгаас зарлаагүй байхад мэдээлэв.  Түүний өгсөн мэдээллийн эсрэг Монголбанкнаас хавраас нааш таван хувийн асуудал шийдэгдэхгүй гэх тодруулга хүртэл өгөөд буй.

Тэрээр өөрийн энэ мэт бүтэлгүйтлээ  байнгын хороо, чуулганы танхимд жинтэй хэдэн үгээр илэрхийлээд, асуудалд илүү бодьтой хандаж явдаг С.Оюун гишүүнтэй хуваалцахыг хүсэж, түүнийг аргадсан боловч санаснаар нь хариулт өгөхгүй нь бололтой. УИХ-ын гишүүн С.Оюун ““Шударга ёс” эвслийн дэд дарга З.Баянсэлэнгийн бичсэн захианы хувьд би бол төдийлөн сайн ойлгохгүй байна. ИЗНН-ын хоёр гишүүн хөндөж тавьсан асуудал, бодлого чиглэлээ хэрэгжүүлж чадахгүй байгаа учраас манай бүлэгт сууж болно гэж хэлэх гээд байгаа юм уу даа. Би нэг л сайн ойлгохгүй байна. Бидний хувьд бол цөөн суудалтай ч тодорхой асуудал, хууль, ажлын хэсэг дээр өөрийн намын мөрийн хөтөлбөрийг бүтээлчээр шигтгэхийн төлөө харин ч амжилттай ажиллаж байгаа. Тэр болгон хийсэн ажлаа зарлаад, рекламдаад байдаггүй ч гэсэн нэлээн олон асуудлыг шийдсэн. Цаашид “Шударга ёс” эсвлийн бүлэгтэй нэгдэх тухай асуудал тавьсан ч дэмжихгүй байх” гэсэн жинтэй хариулт өгсөн юм.

Ж.Мядагбадам