Сонгууль дөхсөнтэй ч холбоотой юу УИХ-ын гишүүн Женко Х.Баттулгын талаар таагүй мэдээлэл

 өдөр өдрөөр нэмэгдэж, энхийн цагаан тагтаа байсан хүн гэнэт л хар хэрээ мэт харагдах болов.

Х.Баттулгын баруун гар гэдэг Зам тээврийн яамны Төрийн нарийн бичгийн дарга асан Б.Батзаяа нарын дөрвөн хүнийг бусдын эд хөрөнгийг залилан мэхэлж авсан, мөнгө угаасан байж болзошгүй гэх хэрэгт холбогдуулан хориод байгаа. Үүнтэй холбоотойгоор УИХ-ын гишүүн Х.Баттулгыг сэжигтнээр татсан байдаг. Харин энэ бүгдийг Х.Баттулга гишүүний зүгээс “Энэ бол баялаг дагасан эрх мэдлийн төлөөх тэмцлийн нэг илрэл. Цаашид зориудын явуулгатай өөр олон асуудлууд өрнөх байх” гэж байсан юм.

Тэгвэл одоогийн байдлаар түүнтэй холбоотой нэгэн таагүй асуудал үүссэн нь Х.Баттулга гишүүний санхүүжүүлдэг Хэро энтертайнментаас эрхлэн гаргадаг “Монгол тулгатны 100” эрхэм нэвтрүүлгийн бичлэг алдагдсан явдал болоод байна. Нэвтрүүлгийн багийн зүгээс үүсээд буй асуудлаар сэтгүүлчдэд мэдээлэл хийхдээ “маш нарийн зохион байгуулалттай бүлэг этгээд хийсэн тусгай ажиллагаа” гэж онцлон, Х.Баттулга ямар ч холбогдолгүй хэмээн Б.Баатар найруулагч цээжээрээ хамгаалав. Мөн үеэр улстөрийн захиалгат ганцхан дугаар хийсэн нь өнгөрсөн сонгуулийн өмнө Ерөнхийлөгч Ц.Элбэгдоржийнх байсан гэдгийг хэлэв.

Сүүлийн үед үүсээд байгаа эдгээр шуум хоорондоо холбоотой, цаашлаад Женко Х.Баттулга, Ерөнхийлөгч Ц.Элбэгдорж нар хоорондоо дайн эхлүүлэв үү? гэх хардлагыг төрүүлэх хэд хэдэн сэжүүр байна.

1-рт өнгөрсөн 2014 онд мөн л Херогийн 100 чухал сэдэв нэвтрүүлгээр төмөр замын нарийн царигийн асуудал, улс төрчдийн гарал угсааг сөхөж, улмаар Ерөнхийлөгчийн өрөөнд дуудагдаж, камерийн өмнө загнуулав. Энэ үеэс л түнжин муудсан гэдэг.

2-рт Б.Батзаяа нарыг АТГ-аас шалгаж, Х.Баттулга ч хомрогонд өртөөд байгаа. АТГ-ыг Ерөнхийлөгч Ц.Элбэгдоржийн санаачлагаар байгуулсан гэдгийг хэн бүр мэднэ.

3-рт Монгол тулгатны 100 эрхэм нэвтрүүлэгт Ардчиллын үндэсийг тавигчдын нэг Сосорбарам гавьяатыг урьж оролцуулахдаа Х.Баттулга гишүүн өөрөө хөтөлж, Ерөхийлөгч Эбигийн багийг мөн л муулуулаад амжив.

4-рт Монгол тулгатны 100 эрхэм нэвтрүүлэгийн бичлэг нийтэд цацагдсан явдал юм. Тус бичлэгүүд дээр Х.Баттулгын талаар сайныг өгүүлсэн яриа байх бөгөөд харин Ерөнхийлөгч Ц.Элбэгдорж болон зарим нэг хүмүүсийг хар яриагаар “байхгүй” болгосон гэж болно. Мөн Херогийн Б.Баатар мэдээлэл хийхдээ Улстөрийн зорилгоор хар дүрсийг дотроосоо тараасан гэх хардлага байна гэсэн сэтгүүлчийн асуултад “Миний бие болон манай багаас бичлэгийг зориуд тараагаагүй гэдгээ хариуцлагатайгаар мэдэгдэж байна. Бидний  дундаас улстөрд орох сонирхолтой нэг ч хүн байхгүй, бүгд уран бүтээлчид. Манайх улс төрийн студи биш, улс төрийн редакци ч биш. Бид ганцхан удаа л захиалгат нэвтрүүлэг хийж байсан нь Монгол улсын Ерөнхийлөгчийн сонгуулийн өмнө Ерөнхийлөгч Цахиагийн Элбэгдоржийн оролцсон нэвтрүүлэг юм.” гэж онцолж хэлэв.

Юуны учир Ерөнхийлөгчийг онцлов. Хэдийгээр хэвлэл мэдээллийн уран бүтээлчид хэн нэгнээс хараат бусаар ажлаа явуулахыг эрхэмлэдэг ч, шаардлагатай үедээ эзэн нь юмаа мэдэж, өөрийн хүссэнээр хөдөлгөдөг байхыг үгүйсгэх аргагүй юм.