Улс төрөөс гараа татаж хэсэг хугацаанд нам гүмхэн байсан Л.Гүндалай 2016 оны сонгуулийн сургаар улс төрд эргэн ирсэн. Улс төрчидөөс хамгийн түрүүнд сонгуулийн шоугаа эхлүүлж “Ард түмнээ хайрлая” гэх сүржин нэртэй нам хүртэл байгуулаад амжсан. Л.Гүндалай эрхэмийн байгаа байдал, хэлсэн үг, хийсэн үйлдэл бүр нь олныг баясгаж, бухимдуулахыг зэрэгцүүлж байгаа гэхэд буруудахгүй. Б.Жаргалсайхантай нэгэн телевизийн ярилцлагад хамтдаа оролцож үзэгчдийг багагүй хөгжөөж Б.Жаргалсайханыг тэвчихийн аргагүй болтол бухимдуулсан. Үүний дараахан Орхон аймагт иргэдэд үнэгүй газар олгоно хэмээж баахан бусниулаад авсан. Энэ үеэр иргэдийг багагүй үг хэлээр доромжилж “Чадалтай нь надтай хамт тэмцээд газраа ав. Газар авч чадахгүй нь чацга царайлаад гэртээ харь. Аймгийн газрын алба энд газар өгөх асуудлыг шийдвэрлэдэггүй юм. Би мэдэж байна” гэх зэргээр том том дугарч байгаад явсан удаатай. Өдгөө Л.Гүндалайгийн хэлсэн “чадахгүй нь чацага царайлаад яв” гэх үгс иргэдийн дунд бренд болсон. Тэгвэл мань хүн хэлсэн үгээ булзайруулж нэгэн телевизийн ярилцлагад “Яг үнэндээ бол би тэгж хэлээгүй. Чацга алдаж байгаа хүн байвал харь аа л гэсэн” хэмээн засах гэж хичээв. Дараа нь ингэж амаа барих байсан бол юунд тухайн үеийнхээ сэтгэл хөдлөлөөр сагсуурна вэ эрхэм Л.Гүндалай та.

Эх сурвалж: Шуурхай.мн