Газрын тухай хуулийн төслийн 34.1.3-т Монгол Улсад байнга оршин суугаа гадаадын иргэн буюу 183 хоногоос дээш хугацаагаар амьдарч байгаа, харьяалалгүй хүнд гэр бүлийн хамтын хэрэгцээний зориулалтаар газар ашиглуулна гэнэ ээ. Ямар хямдхан боломж, ямар утга, учиртай 183 хоногийн цензур вэ. Уг хуулийн 37.3-т Гадаадын хөрөнгө оруулалттай аж ахуйн нэгжид газар ашиглуулахдаа Монгол Улсын хуулийн этгээдэд газар ашиглуулахтай адил зарчмыг баримтална гэсэн байна. Үүнийгээ бодвол гадаадын хөрөнгө оруулалтыг татах гэж байгаа юм гэж тайлбарлах байх л даа. Монголын газар нутгийг ингэж үнэлж цэгнэнэ гэдгийг өвөг дээдэс мэдэхгүй, сөөм газрыг ч алдалгүй хойч үедээ өвлүүлж үлдээх юм шүү гээд л цусаа асгаруулаад байж шүү дээ.

Ардчиллын партизанууд ярьдаг юм. Бид та нарт газар, мал, орон сууц, гадаад паспорт өгсөн гээд л ярьдаг. Өөр энд дурьдаж багтамгүй олон зүйлийг өгсөн юм гэнэ билээ. Үнэн л дээ. Харин өмч хувьчлал бүрийнхээ “но”-г бас бүү мартаарай. Ер нь “но”-гүй хувьчлал гэж байгаагүй. Үүний нэгэн адил газар өмчлөл, ашиглуулалтын талаар олон удаа хуульдаа тусгаж байсан. Оюутолгойн гэрээг батлуулах үеэр хамгийн зоригтой тоглосон. Хойч үе биднийг өршөөх эсэхийг бүү мэд. Харин одоо Газрын тухай хуулийн төслийг дахин нягтлах шаардлагатай гэдгийг олон нийт мэдрээд байна. Тийм ч учраас өнөөдөр Чингисийн талбайд энэ хуулийн төслийг эсэргүүцэгчдийн цуглаан болох гэнэ.