“Хэцүү анги”-ийн хэрсүү Гэрлээ нэг л өдөр миссийн титмийг зүүсэн. Тэрээр загвар өмсөгч, жүжигчин. Ирээдүйн эмч болохоор суралцаж буй. Мисс Б.Бадамцэцэгтэй холбогдлоо.

-Сайн байна уу утасны анд байна. Сургууль дээрээ байгаа юм уу. Сурлага өндөр үү?
-Сайн. Танай сонины уншигчдад энэ өдрийн мэндийг хүргэе. Сурлага өндөр шүү. Яг одоо хичээл завсарлачихсан, ангийнхантайгаа сууж байна.

-Амрах дөхөөд хичээл ихтэй байгаа байх. Уран бүтээлийн ажлаа хэрхэн амжуулж байна?
-Ерөнхийдөө киноны ажлаас түр чөлөө аваад байна. Хичээлдээ анхаарах цаг болсон. Шалгалт дөхчихсөн болохоор одоохондоо өөр зүйл бодох завгүй явна.

-Оюутан хүнд мөнгө хэрэгтэй. Нууц биш бол өдөрт хэрэгцээндээ хэдэн төгрөг зарцуулдаг вэ?
– Өөрийн гэсэн орлого байхгүй. Өдрийн хэрэгцээний мөнгөө ээжээсээ л авдаг. Оюутан хүн яаж амьдардаг, хаана, юу иддэг би тэр бүхнийг л хэрэглэдэг. Бусдаас онцгойрч, ялгарч байсан удаагүй.

-Тэгвэл яг одоо халаасанд чинь хэдэн төгрөг байна вэ?
-Өдрийн хоолоо идэх, гэртээ харих унааны мөнгө байгаа шүү.

-Ингэхэд жингээ хэрхэн барьдаг вэ?
-Наад асуудал чинь үнэхээр хэцүү. Би таргалж, турах нь амар. Гэхдээ хоолоо сойж чаддаггүй. Өөрийнхөө одоогийн төрхөнд сэтгэл хангалуун явдаг. Эмэгтэй хүн өөртөө багахан анхаарал тавихад л сайхан харагдаж чадна шүү дээ.

-Нүүр будалтын хувьд?
-Нүүрээ хэтэрхий будах эвгүй санагддаг. Өөртөө зохицуулаад хөнгөн, цэвэрхэн будах нь таалагддаг. Одоо хичээл ихтэй болохоор өглөөдөө нар салхинаас хамгаалах гэж суурь энгэсэг тавиад л гарч байна.

-Манай бүсгүйчүүд брэнд гэж хошуурдаг шүү дээ. Өөрийн чинь хувьд?
-Брэнд гэдэг чинь үг төдий шүү дээ. Миний хувьд нэр төрийн баталгаа гээд брэнд хөөгөөд байх дургүй. Биед эвтэйхэн, таалагдсан хувцсаа хаанаас ч хамаагүй авдаг. Харин өндөр өсгийтэй гутал төдийлөн өмсдөггүй.

-Юугаар гоёх дуртай вэ?
-Б.Содтуяа багш минь эмэгтэй хүнд хоёр гоо сайхан байдаг гэж сургадаг. Гадаад гоо сайхнаас гадна сэтгэлийн гоо сайхан хамгийн чухал. Хэдий гаднаасаа үзэсгэлэнтэй ч сэтгэлийн гоо сайхан байхгүй бол тэр хүн гэрэлтэж харагдахгүй.

-Чамайг дагасан хэл ам гарах болжээ. Энэ бүхэнд хэрхэн хандаж байна?
-Хүмүүс юу гэж бичих нь сонин биш. Миний тухай надаас өөр хэн ч мэдэхгүй. Хүмүүс мууллаа гээд би муу болчихгүй. Худал, үнэн хэзээ нэгэн цагт ялгарна гэдэгт итгэдэг.

-Шоучин гээд биччихсэн байна лээ. Ер нь зугаа цэнгэлийн тухай ямар бодолтой явдаг вэ?
-Залуу насанд найз нөхөдтэйгөө нийлж, зугаацах нь хүн бүхэнд байдаг л асуудал. Цэнгээний газар архи ууж, тамхи татахдаа биш, бүжиглэж сэтгэлийн таашаал авах нь чухал гэж би боддог. Гэхдээ би шоу цэнгээн хөөдөггүй.

-Ирээдүйд олон ажил хийхээр төлөвлөсөн байх. Түүнээсээ хуваалцаач?
-Сургуулиа төгсөөд сайн эмч болмоор байна. Загвар өмсөгч гэдэг залуу насны мэргэжил. Би миссийн титмийг зүүсэн, залуу нас минь дэлгэцэнд мөнхөрсөн. Энэ бүхэн хэзээ ч мартагдахааргүй сайхан дурсамжууд. Харин ирээдүйд бүсгүй хүн бүрт гоо сайхныг, сэтгэл ханамжийг бэлэглэдэг гоо сайхны эмч болмоор байна.

Зууны мэдээ сонин