Дархан хотын 50 жилийн ойн баяр энэ онд тохиож буй. Харин ойн дараа бидэнд юу үлдэв гэдэг асуултыг олон иргэн тавьж байна. Харин үүнд зарим нь айл бүр аягатай, ундаа пивоны онгойлгогчтой, бас англи хэлний тольтой үлдэж байх шив хэмээн хариулж байна. Учир юу гэвэл УИХ-ын гишүүн Ж.Сүхбаатар цагаан сарын үеэр айл өрх бүрт өөрийн зурагтай аягыг бэлэглэв. Дээшээ харсан сав гээд иргэд гайгүй хүлээн авчээ. Харин 10 сарын 17-нд Дархан хотын өдрөөр УИХ-ын гишүүн Д.Хаянхярваа бүх сурагчдад бөглөө онгойлгогч өгчээ. Айл гэрээр бөглөө онгойлгогчоо тараахгүй, хүүхдүүдэд нь тараасанд ундууцах эцэг эхчүүд олон байж. Одоо цагт онгойлгох бөглөөтэй ундаа гэж бараг байхгүй гэхэд болно. Байгаа нь ганц. Тэгэхээр онгойлгогчоор мэдээж пиво л мултална шүү дээ. Өгөхийн буухиа дараагийн гишүүнд шилжлээ. Тэрээр арай л дээр юм бодож олжээ. УИХ-ын гишүүн Л.Гансүх сургуулийн дунд, ахлах ангийн сурагчдаар дамжуулан өрх бүрт англи монгол хэлний толь бичиг бэлэглэлээ. Энэхүү толь бичгийг 4-11 дүгээр ангийн хүүхэдтэй айл бүхэнд нэгийг өгөхийн дээр 120 гадаад хэлний багш нарт гардуулжээ.

У.Гэгээ