Сүүлийн үед хууль хянал­тын бай­­­гуул­лагынхан, тэр дун­даа цаг­даа­­гийн алба хаагч­дын нэр дуулиан дагуул­­сан хэргүүдэд сонсогдох болов. Шийд­вэрлэх учир­тай хуу­лийн­хан дунд нь хутгал­да­хаар хэрэг зам­хар­даг яв­дал “моод” мэт. Тухайлбал, өнгөрсөн дөрөв­­­дүгээр сарын 3-нд “Хятадууд нууцаар их хэм­жээ­ний самар бэлтгээд гадагш гар­гахыг завдаж бай­на” гэсэн мэдээл­лийг жирийн иргэд цагдаагийн 102 дугаарын утсанд өгсөн.

Ингээд иргэдийн өгсөн мэдээллийн мөрөөр цагдаа нар хэр­гийг шалгасан ч өнөөдрийг хүртэл “самрын контрабанд” ший­дэгдсэнгүй. Харин ч хэргийг шал­га­сан цагдаа нар 40 сая төг­рөгийн хахуулийн хэрэгт орооцолдсон юм. Олон арван сая төгрөгийн ха­хуульд хутгалдсан нөхөд нь Нийслэлийн хэв журмыг хам­­гаалах газар, Хөдөлгөөнт эр­гүүлийн цагдаагийн ахлах ах­лагч нар аж.

Тодруулбал, хэргийн газарт очиж, хууль бусаар самар бэлтгэж байсан хятадуудын үйл ажиллагааг таслан зогсоож, самрыг нь хурааж авах үүрэгтэй алба хаагчид наймаачидтай үгсэн, тэднээс 40 сая төгрөгийн хахууль авсан. Улмаар хэргийг нь хаацайлж, самрыг гадагш гаргасан байдаг.

Дээрх хэргийн талаар холбогдох албаныхан “Хэргийг шалгаж дуусаад яллах дүгнэлт үйлдэж, прокурорт шилжүүлсэн энэ хэрэгт цагдаагийн алба хаагчид холбогдсон тул олон ний­тийн анхаарлыг татаж байгаа. Энэ хүмүүсийг 40 сая төгрөг авсан гэдгийг нь хөдөлшгүй баримтаар тогтоосон байдаг. Хэргийн гол буруутан болох хятад иргэд хил давж зугтсан тэд одоог хүртэл олдоогүй байгаа.

Уг нь манай улсын хилээр гарах үед дээрх хоёр иргэнийг саатуулж болох байсан гэдгийг албаныхан ч хэлдэг. Мөн гэрчүүд ч бий. Гэтэл хэргийг шалгах учиртай цагдаа нар 40 сая төгрөгөөр нэр төр, үнэ цэн, цаашлаад Монголын цагдаагийн сүр хүчийг худалдчихсан. Уг нь мөрдөн байцаалтын явцад хятадууд хилээр жонш гаргах нэрээр самар авч гарах гэснээ хүлээсэн.

Гэхдээ дээрх мэдүүлгийг хятадууд өгсөн үү, цагдаагийн алба хаагчид хуурамчаар үйлдсэн үү гэдэг нь тун эргэлзээтэй. Энэ хэрэгт Хятадын томоохон компанийн захирал холбогд­сон гэдэг ч мөн хавтаст хэргээс тус­гаарласан. Ийнхүү хоёр хятадтай холбоотой хэрэг хэзээ шалгагдах нь тодорхойгүй, түр хугацаагаар хавтаст хэргийг түдгэлзүүлэн хаасан байж болзошгүй.

Үүнээс үзэхэд самрын наймааг зөвхөн эрх мэдэлтэй, хуулийн цоорхойг сайтар мэддэг хүмүүс үйлддэг хэмээн ярьдаг нь оргүй биш бололтой. Тиймдээ ч “самрын” гэх хэргүүдийн нэг нь ч одоог хүртэл шийдэгдээгүй байгаа. Хамгийн гол нь 40 саяын хахууль авсан хэрэгт 10 гаруй хүн холбогдсон. Эдгээр хүн хууль бус наймааг таслан зогсоохын оронд нууцаар хил давуулах боломжийг нь бүрдүүлж өгсөн байгаа юм.

Үүнээс харахад илэрсэн нь дээрх хэрэг болохоос биш цаана нь үүгээр гаршсан сүлжээ байж ч мэднэ. Учир нь УЕПГ-ын дэргэдэх Мөрдөн байцаах албаны дарга Б.Галдаа “Зохион байгууллалтын шинжтэй хэрэг байхыг үгүйсгэхгүй. Самрыг хилээр жонш нэрээр гаргах гэж байхад нь олж тогтоосон. Таван вагонд ачуулсан. Нэг вагонд 45 тонн ордог гэхээр 225 тонн.

Мөрдлөгийн үед самар агуулж байсан сав байранд нь үзлэг хийсэн юм. Тэгэхэд үнэхээр самар цайруулж, хадгалж байсан ул мөр илэрсэн. Тэгэхээр иргэдээс их хэмжээний самар авч, ачуулсан нь тодорхой болж байна” хэмээн мэдэгдэж байсан. Ямартай ч цагдаа нар холбогдсон авлигын хэрэг энэ ондоо шийдэгдэхгүй нь тодорхой болсон. Яагаад гэвэл уг хэрэгт цагдаагийн алба хаагчид оролцсон. Тиймээс шийдэгдэхгүй удах биш, бүр замхарчих вий.
Эх сурвалж: “Өглөөний Сонин”