Хууль зүйн сайд Х.Тэмүүжингийн эсрэг 22 гишүүн хүч хавсарлаа.

Тэд хууль зүйн салбарын сайдад оффисс хэрэгтэй байгаа бол ард түмэнд эмнэлэг үгүйлэгдэж байна хэмээн мэдэгдэв. Төрийн тусгай албан хаагчдын нэгдсэн эмнэлгийн барилгыг хэвээр үлдээхийг УИХ-ын 22 гишүүн дэмжиж, гарын үсгээ зурж, баталгаажуулжээ.  Тэдгээр гишүүд эмнэлгийн барилгын зориулалтыг өөрчлөх тухай Засгийн газрын шийдвэрийг хүчингүй болгох тухай тогтоолын төслийг УИХ-д өргөн барихаар болсон байна.

Энэ тухай УИХ-ын гишүүн Ё.Отгонбаяр “ ТТАХНЭ-ийн барилгыг бариулах шийдвэрийг УИХ-аас гаргаж, дөрвөн жил дараалан холбогдох зардлыг төсөвт суулгаж ирсэн. Тиймээс төрийн шийдвэрийг дураараа өөрчлөх эрх Засгийн газар, салбар хариуцсан сайдын аль алинд байхгүй. Монголд байхгүй эмнэлгийн тоног төхөөрөмж (MRI, CT)-ийг хэдийнэ суурилуулсан байгаа.

ТТАХНЭ байлгахгүй  гэвэл Эрүүл мэндийн яам мэдэлдээ авч, төрөх эсвэл улсын мэдлийн тусгай зориулалтын эмнэлэг болгох хэрэгтэй” гэв. ТТАХНЭ-ийн Эмчилгээ эрхэлсэн орлогч дарга, хошууч Т.Нарантуяагийн мэдээлснээр тус эмнэлэг 239 ажилтантай,  200 ортой юм байна. Жилд 5000-6000 өвчтөн хэвтэн эмчлүүлдэг бол 90-100 мянган иргэнд нийгмийн эрүүл мэндийн тусламж, үйлчилгээг үзүүлдэг байна.

Харин шинэ эмнэлгийн цогцолбор ашиглалтад орвол дээрх тоо 2-3 дахин нэмэгдэх аж. Эмнэлгийн ажилчид тэмцэл өрнүүлээд Хууль зүйн сайдын эрх мэдлийн өмнө хүчин мөхөсдсөн тул энэ удаад МАН болоод Шударга ёс эвслийнхэн хүч хавсарч, Р.Амаржаргал уриалан дэмжсэнээр тэмцлээ өрнүүлж эхлэх нь.

Эрүүл Монгол хүний талаар мөрийн хөтөлбөртөө дэд сэдэв болгож оруулсан атлаа эмнэлгийн барилгын зориулалтыг нь өөрчлөхөөр “шуналтаж” буй эрх баригчдад тэд хатуухан сануулга өгөхөө ч мэдэгдлээ.
Л.Нинж
Эх сурвалж: “Нийгмийн Толь”