Ээлжит сонгууль явагдаж, эрх баригчид өөрчлөгдөж төр засаг шинээр байгуулагдахад нэг асуудал үүсдэг. Тэр нь томилгоо. Томилгоонуудад ард иргэд 100 хувь сэтгэл хангалуун гэж байхгүй байхад улстөрчид өөрсдөө урваж шарван новшрох ч байх л үзэгдэл байх. Гэхдээ энэ шинэчлэгдсэн Засгийн газрын ганц томилгоо нийт монголчуудын сэтгэлд… Сэтгэлд гэхээсээ ашиг сонирхолд яв цав нийцсэн гэдгийг хэлэхэд илүүдэх юун. Мэдээж тэр жигтэйхэн сайхан нэг үгээр нүдээ олсон томилгоо бол Хэрэглэгчдийн эрх ашгийг хамгаалах нийгэмлэгийн даргаар гудамжны жагсагч гэх базаахгүй гуншинтай ч үнэн үгтэй залуу хэмээн үнэлэгддэг О.Магнай очсон явдал.

Тэрбээр ажлаа авангуутаа л нефть импортлогч компаниудад ноогдуулсан 17 тэрбумын хэргийг зөвлөлөөрөө хэлэлцээд Авлигатай тэмцэх газарт шйлжүүлсэн нь чухам л загатнасан газар маажих шиг болсон. Тэгээд бас тухайн мөнгийг улс төсөвт оруулахын тулд бүхий л талын арга хэмжээг авна гэдгээ мэдэгдсэн нь өнөө цагт ховор сайхан мэдээ биш гэж үү.

Бас тэрбээр үүрэн телефоны оператор компаниудыг нэг секунд ярьсан ч нэг минутаар тооцож мөнгө авч хэрэглэгчдийг шулдагтай тэмцэхээр шийдэж, албан тоот хүргүүлсэн. Гар утасны ярианы тарифыг минутаар биш секундээр тооцдог болгохоор үүрэн телефоны операторуудтай тохиролцсон нь энэ оны тэмдэглүүштэй чухал үйл явдлын нэг яах аргагүй мөн, хэрэглэгчдийн хувьд.

Мөн дараа төлбөрт дугаар эзэмшигчдийн барьцаанд тооцдог хүүг төлбөрөөс нь хасуулахаар болсон нь шударга арга хэмжээ болсон. Уг нь оператор компаниуд дараа төлбөрт дугаар эзэмшигчдээс нийт найман тэрбум төгрөгийн барьцааг дансандаа байршуулж, сард 300-400 сая төгрөгийн хүү монждог байсан гэж байгаа. Харин өдгөө барьцаанд тавьсан мөнгөнийх нь хүү сарын төлбөрөөс нь хасаж тооцогдоно.

Энэ ажил хэрэг болж мэдэх юм шиг байна лээ. Харин минут секундын тухайд дуулгах хов байнаа. Шуудхан хэлчихэд, цаадуул чинь новшрохоор шийдчихсэн байна лээ. Манай техник технологиуд хэрэглэгчдийн яриаг нэг секундээр тооцох боломжгүй учраас техникийн шинэчлэл хийснийхээ дараа л хэрэглэгчдээ шулахаа болих боломжтой гэсэн юм ярьсан нь бор шувуунд дайгдан нисэж явна лээ.

Итгэж болохгүй шүү, цаадуул чинь зальжин. Хэрэглэгчдийг хэрхэн шулж мөлжихөө хачин сайн мэддэг. Худал үнэн шалтаг хэлж байгаад өөрийн чинь гаргасан шийдвэрийг хог болгох гэж байгаа юм. Болгоомжтой л байгаарай гээд дамжуулчихад илүүдэх юун. Нээрээ өчигдөр мань О.Магнай холбогдох албаныхны хамтаар архи, пиво үйлдвэрлэгч компаниудтай уулзаж, хууль зөрчсөн үйлдэлд хариуцлага тооцох хатуу сануулга өгнө лээ.

Бас компаниудад есдүгээр сарын 26-нд тавьсан мөнгөн торгуулийг тав хоногийн дотор төлж барагдуулж, цаашид архи, пивоны сурталчилгааг хуулийн дагуу явуулж байхыг сануулсан. Тэгээд дахин хууль зөрчвөл мөнгөн торгуулийг ШӨХТГ-аас тавихгүйгээр шууд тусгай зөвшөөрлийг цуцлах арга хэмжээ авна гэж “айлгасан”. Айсан байх гэж найдаж байна. Айлгахгүй л бол болдоггүй золигнууд байгаа юм. Ар өврийн хаалгаар ард түмнээ мөлжсөөр байгаад бүр хэвшчихсэн дамшигнууд…

Уулзалтад “АПУ”, “Спирт бал бурам”, “Asia Pacific Breweries” зэрэг архи, пиво үйлдвэрлэгч компаниудын төлөөлөл оролцсон. ШӨХТГ- ын зүгээс тэдгээр компанид хүлээлгэх арга хэмжээнээс гадна тав хоногийн дотор тус тусын албан тоотыг ирүүлэхийг шаардсан юм. Албан тоот нь заасан хугацаанд торгуулиа төлж барагдуулах, цаашид архи, пивоны сурталчилгааг хуулийн дагуу явуулж, хууль зөрчсөн тохиолдолд тусгай зөвшөөрлөө хураалгахыг хүлээн зөвшөөрсөн утгатай юм байна лээ.

Түүнээс гадна Монгол Улсын Зар сурталчилгааны тухай хуульд архи сурталчлахгүй байх, шар айргийг шөнийн цагаар эрүүл мэндэд хортой гэсэн сануулгын хамт сурталчилж болох тухай заасан байдаг учраас ШӨХТГ- аас хуулиа дагахыг шаардах нь зүйн хэрэг. Ингэлээ гээд орой үдшийн цагаар эцэг, эхийнхээ хуруу хумсаа хуйхлах нь халаг болж хуримтлуулсан мөнгөөр шоуддаг хүүхдүүд бага ч гэсэн ухаарч баасан ахын төрсөн өдрийг тэмдэглэхээ болих ч юм билүү.

За ямартай ч ийнхүү архи, пиво дотооддоо үйлдвэрлэдэг аж ахуйн нэгжийн төлөөлөлтэй уулзсан О.Магнай дараагийн удаа архи, пиво импортолдог аж ахуй нэгжүүдийг хүлээн авч, уулзахаа хэлсэн шүү. Дахиад сануулахад, цаадуул чинь зальжин шүү. Элдэв арга сааманд автаж иргэдийнхээ итгэлийг л алдаж болохгүй шүү, хө.
Х.Хүслэн
Эх сурвалж:”Улаанбаатар Таймс”