Нийслэлийн Баянзүрх дүүрэгт дахин сонгуулиар өрсөлдөх эрхтэй болсон УИХ-ын гишүүн асан Д.Арвин, тус дүүргийн Засаг дарга Б.Батзориг нарын хооронд жинхэнэ “тулаан”  болж байгаа аж.

Учир нь ирэх арваннэгдүгээр сарын 21-нд болох Орон нутгийн сонгуультай хамтатган УИХ-ын нөхөн сонгуулийг явуулахаар тогтсон бөгөөд Баянзүрх дүүрэгт МАН-ын хоёр гишүүн ийнхүү тунаад байгаа юм.

Д.Арвины хувьд эмэгтэйчүүдийн квотоор нэр дэвших эрхээ олж авсан бол Б.Батзориг өөрийн удирдаж байгаа дүүрэгтээ хүч үзэж буй. Гэхдээ Улаанхуарангийн унаган хүүхэд гэж өөрийгөө Баянзүрх дүүрэгт хамаатуулж байгаа Д.Арвинаас илүү Засаг даргаар одоо ч ажиллаж байгаа Б.Батзоригт боломж их бий. Гэвч түүний талаар сайнаасаа илүү саар зүйл дуулдах нь элбэг.

Наад зах нь түүнийг “Баянзүрх”-чүүд “хөшөө Засаг дарга” хэмээн нэрийддэг юм билээ. Тодруулбал, Нийслэлийн хамгийн их хүн амтай, ядуурал ихтэй дүүрэгт долоо, найман цэцэрлэг барихуйц мөнгөөр хөшөө хийж, имижээ өсгөдөг нэгэн ажээ. Гэхдээ ч зүгээр нэг хөшөө биш, мань хүний хайртай банхар нь өөд болонгуут адилхан Банхар нохойны хөшөөг удирдаж буй дүүргээ тойроод л босгож өгсөн байх юм.

Тэрээр 2011оны ажлын тайландаа дүүрэгтээ 70 тэрбум төгрөгийн бүтээн байгуулалт хийснээ мэдэгдсэн. Гэвч улсын төсвөөс хуваарилагдсан энэ их мөнгийг үр ашиггүйгээр зарцуулсанд Баянзүрхчүүд харамсч сууна. Учир нь тус дүүргийн хэмжээнд одоогоор таван өрхийн эмнэлэг, дөрвөн ч хүүхдийн цэцэрлэг дутагдалтай байгаа аж.  Энэ дагуу урьдчилгаа болгож өрхийн эмнэлэг барихад 200, цэцэрлэгт зориулж 500-600 сая төгрөгийг улсын төсвөөс суулгаж өгчээ.

Харамсалтай нь энэ мөнгө бас бус төсвийн мөнгөтэйгээ нийлээд дүүргийн Засаг даргын тамгын газрын байр, Сансар, Амгалангийн аюулгүйн тойрог дээрх том нохой, эвтэй дөрвөн амьтны хөшөөнд зарцуулагдсан байна. Засаг дарга Б.Батзориг уг хөшөөнүүдийг тус бүр нэг тэрбум төгрөгөөр босгосон тухайгаа ажлын тайландаа тусгасан байна. Гэвч энэ нь дүүргийн бусад албан тушаалтнуудын болоод мэргэжлийн хүмүүсийн эгдүүцлийг хүргэсэн гэдэг.

Гол нь эдгээр хөшөөний тус бүрт үнэтэйдээ 200 сая төгрөг элбэг хүрэх байж.Энэ бүхнээс илүүтэй аюулгүйн тойрогт байрлах эвтэй дөрвөн амьтны хөшөөг сонирхох гэж нэлээдгүй хүүхэд автомашинд дайруулах шахсан удаатай. Хөшөөг үзэх хүсэлт хүмүүс гурван эгнээ машины зам туулах шаардлагатай болдог. Харин энэ тухайгаа Засаг дарга Б.Батзориг эрс няцаадаг. Түүний хэлж буйгаар “эвтэй дөрвөн амьтаны хөшөөг холоос харж, нүд баясгах” зорилгоор баригдсан гэх.

Эцсийн эцэст хүн амынхаа амжиргаанд хэрэг болох ганц хоёр обеъкт босгох биш, Тамгын газрын байраа гантиг чулуугаар бүрэхээс өөр энэ эрхэмд хийх ажил олдоогүй юм байх даа хэмээн халаглах хүмүүс олон.

Сонирхуулахад, Баянзүрх дүүргийн Засаг дарга Б.Батзоригийг “Кёкүшюзан хөгжил сан”-г удирдаж байх хугацаанд сумоч Д.Батбаярын компанийн хөрөнгийг захиран зарцуулж, нэлээд хөлжсөн гэж ярьдаг. Мөн     “чинээлэг” гэдгээ гайхуулах дуртай түүнийг гэр бүлийнхэндээ үнэтэй автомашин бэлэглэхээс гар татдаггүй хэмээн үеийн нөхөд нь ам булаалдан  ярьдаг юм билээ. Тухайлбал, хүүдээ “Бенз С500”, эхнэртээ “Ланд Круйзер 105” авч өгсөн юм байх. Харин өөрөө “Мустанг”, “Рэнжровер” мэтийн тансаг автомашиныг хөлөглөдөг.

Харин Баянзүрх дүүргийн Засаг дарга Б.Батзоригын “өрсөлдөгч” Д.Арвин өмнө нь хоёр ч удаа парламентад суусны хувьд хэрхэн ялах аргыг мэдэж байгаа ч энэ удаа их л тэвдэж яваа сурагтай. Ямар сайндаа л хүч тэнцвэргүй тулаан болж байгаад бухимдан Б.Батзоригийг сонгуулийн хууль зөрчиж, сурталчилгаа хийж байгаа тухай намынхаа Ёс зүйн хороонд өгчихсөн байгаа гэсэн. Хэрэв намын Удирдах зөвлөлөөс ямар нэгэн дорвитой арга хэмжээ авахгүй бол СЕХ-нд гомдол гаргана гэдгээ ч хэлээд авч.

Чингэж гэмээнэ МАН-ын нэр хүндэд муугаар нөлөөлөх учиртай. Уг нь бол Д.Арвин, Б.Батзориг хоёрын хэн ялах нь МАН-д төдийлөн хамаатай бус. Аль нь ч ялсан УИХ дахь суудлынхаа тоог нэмнэ. Харин Б.Батзоригийн ард МАН-ын “Хотын фракц”-ынхан байгаа бол Д.Арвин намынхаа одоогийн удирдлагуудтай дотно. Ингээд бодохоор хоёр гишүүний зөрчлийг Удирдах зөвлөл тун нухацтай авч хэлэлцэх нь дамжиггүй.

Юутай ч Баянзүрх дүүрэгт МАН-ын өнгөрөгч УИХ-ын сонгуульд гаргасан том алдаа төгс хэлбэрээрээ давтагдах болоод байна. УИХ-ын сонгуулиар МАН-ын нэр дэвшигчид хоёр талд гарчихаад бие биенийхээ эсрэг сөрөг пиар хийж ажилласаар байгаад хоёулаа ялагдаж байсан.

Б.Дэжид

medee.mn