БНХАУ-ын цагдаа нар онц аюултай гэмт хэрэгтэн болох 42 настай Жоу Кэхуаг идэвхтэй эрэн сурвалжилж байна. Энэ цуврал дээрмийг үйлдэгч эр найман жилийн хугацаанд дор хаяж арван хүний аминд хүрчээ. Түүний гарт нэг цагдаа, нэг харуулын цэрэг амиа алдсан юм. Өнгөрөгч баасан гарагийн өдөр Чунцин хотод нэгэн төмөр замын цагдаагийн офицер эргүүл хийж яваад буудуулж нас баржээ. Тэр өдрийн өглөө Жоу Кэхуа зэвсэгт халдлага хийх үеэрээ нэгэн эмэгтэйг буудан хороож, өөр хоёр хүнийг шархдуулсан аж. Тэр нийтдээ 250 мянган юань буюу 39 мянга 300 долларыг дээрэмдсэн байна.

Баригдашгүй дээрэмчин эр АТМ ашиглан данснаасаа мөнгө гаргаж авч буй хүмүүс рүү халддаг юм. Цагдаа нарын мэдээлж байгаагаар 2004 оноос хойш тэрбээр Чунцин, Нанжин, Чанша зэрэг хотуудад арван хүний амийг хороожээ. Энэ гэмт хэрэгтэн айхтар зальтайгаас гадна аллагаа зэрлэгээр үйлддэг байна. Тэр хурууны хээ, ул мөрөө үлдээхгүйн тулд хэзээ ч зочид буудлуудаар хоноглодоггүй гэнэ.

Түүний толгойг авчирсан хүнд Чунцин хотын цагдаа нар 500 мянган юанийн шагнал амлажээ. Нийтдээ Хятадын төр, засаг энэ алуурчныг илрүүлэхэд туслалцаа үзүүлсэн хүмүүст 5.4 сая юань буюу бараг 900 мянган долларын “урамшуулал” олгохоор зэхсэн байна.
www.wikimon.mn