Өндөр настан, хөгжлийн бэрхшээлтэй иргэдэд  олгох сая төгрөгийн түрүүч болох 330 мянган төгрөгийг өнгөрсөн лхагва гарагаас эхлэн тарааж эхэлсэн.  Ингэснээр хөгшдийн хүлээлт бага ч болов үр дүнгээ өгч байх шиг байна.  Ямар ч байсан ядуу иргэд хэд хоногтоо л гэдэс цатгалан явах мөнгөтэй боллоо гэсэн үг. Манайд эрх мэдэлтнүүд, олигархиудыг эс тооцвол  боломжийн амьдралтай хүн цөөн учраас олон хүн баярлаж байгаа нь гарцаагүй.

Ямар ч байсан хүмүүс банкин дээр өглөөний 04:00 цагаас эхлэн дугаарлаж, зарим нэгийгээ дарж алах шахаж байна гэнэ.
Яг л тэжээлийн мал шиг дайрцгааж байгаа нь эмгэнэлтэй. Энэ бүхний цаана эдийн засгаа алж, дундаж давхаргыг бүрдүүлж байгаа цөөн хэдэн иргэнээ “цаазалж” байгаа том харгислал явагдаж байна. Манай эдийн засаг тэртээ тэргүй эмзэг байгаа. Зөвхөн сар бүр өгдөг 21 мянга, төрийн албаны цалингийн нэмэгдлээс шалтгаалаад инфляци хөөрч, иргэдээ хэцүү байдалд оруулаад байна.

Үүнээс болоод төв банк нь бодлогын хүүгээ нэмж, цаашлаад арилжааны банкиуд нь зээлийн хүүгээрээ боомилж “алах” шахаад байгаа. Тийм байтал дахиад бөөн мөнгө тарааж, сөхөрсөн эдийн засгаа элгээр нь хэвтүүллээ. Өнөөдөр төр мөнгө тараахаа шийдсэн болохоос дараа нь гарах үр дагаварыг огт тооцоолоогүй хэрэг. Эсвэл тооцсон ч тоогоогүй биз. Ганцхан жишээ татахад л хангалттай. Өнөөдөр мах кг нь 10 мянган төгрөг хүрэх шахаж байна. Учир нь махны нийлүүлэлт тийм хангалттай биш байгаа. Харин эрэлт үргэлж их байсаар л.
Тэр хэрээрээ үнэ өсч байгаа нь эдийн засгийн хууль. Гэтэл дахиад бэлэн мөнгө нийгэмд цацаж байгаа нь эрэлтийг улам гааруулсан явдал болж таарав. 330 мянган төгрөг авсан хүмүүс хамгийн түрүүнд сайхан тарган адууны, эсвэл үхрийн хавирга авч чанаж идэхийг хүсч байгаа нь тодорхой. Ёстой нэг чацга харватлаа өөхтэй хавирга огтлох хүсэл нь оволзож байгаа нь мэдээж шүү дээ. Тэр ч утгаараа махны лангуудыг хоосолж байгаа биз.  Өчигдөрхөн нөөцийн махан дээр 330 мянгатнууд алалцаж, хуйгаар нь хамж байна гэнэ ээ. Гэтэл нийслэлд өдөртөө хэдхэн тонн мах орж ирж байдаг. Эрэлт хуучин нийлүүлэлтээсээ хоёр дахин их байсан бол одоо 3-4 дахин ихэсч байгаа нь тодорхой.

Тийм байтал төр засгаас махны нийлүүлэлтийг нэмэх тал дээр ямар ч арга хэмжээ аваагүй байна. Одоо мах магнаг биш алт болох байлгүй. Бид өнөөдөр зөвхөн махныхаа хүрээнд сэтгээд байгаа болохоос 330 мянгаас болж өргөн хэрэглээний бараа өргөнөөр хэрэглэгчдийн эрэлт нийлүүлэлтээсээ давах нь тодорхой шүү дээ.  Ингэж л төр засаг иргэдээ тэтгэх биш, хорлон сүйтгэх үйл ажиллагаа явуулж байна. Нийгмийн цөөнх болж хувирсан дундаж амьдралтай иргэд маргаашнаас эхлээд үнийн өсөлтийг дийлэхгүй ядуурч, сөхрөхдөө тулах гээд байна.  Болохгүй бол бүгд махны ченж болдог юм уу, өөр арга алга.