Монголчуудын ёс уламжлал гэж нэг айхтар юм бий. Ёс ёмбогор төр төмбөгөр гэж ёс заншлаа төртэй эн тэнцүүлэн үзсэн байдаг.

Тэр ч утгаараа монгол ёс гэдэг заавал үнэн, үгүйдээ л маш чухал байдаг билээ. Бид ёсоо умартан өвөг дээдсийн минь газрын гагнаас хэмээн үздэг ашигт малтмалаа, голын эхээ хайр гамгүй ухаж мөнгө олох сувгаа болгосны гор гарч онгон дагшин байгаль маань бидний нүдэн дээр сүйрч байна.

Энэ нь бүр багадаад Төрийн тэргүүн нь цагаан дээл өмсөж гангарах болоод удаж буй. Уг нь бид чинь төрд зүтгэж байгаа хүнээ төрийн хар хүн хэмээн өргөмжилж хар бараан өнгийн хувцас өмсгөдөг их эртний уламжлалтайсан биш билүү. Монгол ёсоор бол гашуудлын өнгийн дээл өмсөж гангарах болсон Ерөнхийлөгчөө яалтай ч билээ. Христийн шашинтай юм зайлуул бидний ёс ямар хамаа байх вэ гэх үү.

Зарим хүн цагаан дээл өмсөх нь юун муу ёр байх вэ гэж хэлэх, өмөөрөх л байх. Гэхдээ дээхэн үед төрийг тэргүүлж байсан эрхэм цагаан хослолоор гангардаг байхад До яам гэх газрын хэдэн нөхөд баахан хүний амиар тоглосон байдаг. Одоо Авлигатай тэмцэх гэх газрын хэдэн нөхөд их л эрх мэдэлтэй болоод байх шиг. Юм анхандаа шударга л байдаг юм. Н.Энхбаярыг бариад л. Гэхдээ л эрх мэдлийнх нь хязгаар хальж энгийн иргэдээ боймлох бий гэж санаа зовних юм.

Дээр нь сүүлийн үед хоёр ч газар ихэр унага гарлаа гэх мэдээ сонсогдлоо. Базарвааны хум пад. Ихэр унага төрвөл төр самуурахын шинж гэдэгсэн биш билүү. Гэтэл УИХ-ын гишүүн Я.Батсууриас авахуулаад ёсоо алдсан цадиггүй нөхөд түүнийг нь гайхуулан патиар татуулж суух юм. Цагаан дээлтэй Ерөнхийлөгчтэй, ихэр унагатай энэ жилийн сонгууль юу л болох гээд байна даа.