Луу жилийн анхны морин уралдаанд тоосоо өргөсөн “Мон Уран”-ы Б.Наранхүүгийн наран хээр Төв аймагт болсон Дүнжингарав 2012 уралдааны их насанд түрүүлж эзнийхээ магнайг тэнийлгэв. Олны хэл аманд байнга өртөж сайн, муугаараа дуудуулдаг Б.Наранхүү захирал өнгөрсөн жилийн сүүлчээр нэгэн хөөрөгний ченж залуугаас 380 сая төгрөгөөр үнэ хаялцан байж эртний хийцийн шүрэн толгойтой манан хөөрөг худалдан авчээ.

Уг хөөрөг нь 16-17-р зууны үеийн хуучны үнэт эдлэл бөгөөд түүнийг эзэмшиж байсан нэгэн томоохон лам үр, ач нартаа үе дамжуулан өвлүүлснийг хот бараадаж суурьшихаар ирсэн залуу хосууд тэрхүү ченжид 150 сая төгрөгөөр анх зарсан аж. Харин тэрхүү ченж нэлээдгүй мэрийсний хүчинд “Мон Уран”-ы захирал Б.Наранхүүг сонгож ийнхүү чамгүй ашигтай наймаа хийсэн байна. Хурдан морь, сайн чанарын төмөр хүлэг зэрэгт гар татдаггүй Б.Наранхүү луу жилийн өмнөхөн ийнхүү хүнтэй гар зөрүүлж тамхилах нүнжигтэй их гарын хөөрөгтэй болсондоо тун чиг сэтгэл хангалуун байгаа гэнэ.
Ө.Гонгор /www.wikimon.mn/