МАН өөрийн хуучин нэр болох МАХН хэмээх нэрийг өмчлөх гэж оролдсон боловч Дээд шүүх уг намын нэрийг экс Ерөнхийлөгч Н.Энхбаяр нарт өгсөн нь тооцооноос гадуур санаанд оромгүй үйл явдал болсон билээ. Ц.Нямдорж, Д.Лүндээжанцан нарын томоохон хуульчид нь ийнхүү зоримог алхам хийхэд санаа зовох хэрэггүй гэж намынхаа Удирдах зөвлөлийн хурал дээр хэлж ярьсан тул хуучин нэрээ тэд алдана чинээ санаагүй юм. Гэтэл Н.Энхбаярыг улс төрөөс бүрмөсөн шахан зайлуулах гэсэн тэдний төлөвлөгөө талаар өнгөрсөн тул арга буюу түүний эсрэг янз бүрийн хавтаст хэрэг нээж, гэмт хэрэгт холбогдуулан шалгах гэсээр хэдэн сарыг өнгөрөөв. Түүний холбогдох хэргийг эцэс сүүлдээ Авлигатай тэмцэх газарт шилжүүлсэн гэх боловч энэ нь бас л амжилтад хүрсэнгүй.

Тиймээс долоодугаар сарын нэгний хэрэгт холбогдуулан шүүхээр таслагдах гэж буй цагдаагийн дарга нарын гэх хэрэгт Н.Энхбаяр, С.Баяр, Д.Лүндээжанцан, Ц.Мөнх-Оргил нарыг гэрчээр байцаах үндэслэлтэй гэж үзсэн тул шүүх хурлын товыг хойшлуулаад байгаа билээ. Сонгуулийн тухай хуулинд “Аливаа гэмт хэрэгт холбогдсон юм уу шалгагдаж байгаа хүн УИХ-ын сонгуульд нэр дэвших эрхгүй” гэж заасан байдаг. Тиймээс МАХН-ын дарга Н.Энхбаярыг УИХ-ын сонгуульд нэр дэвшүүлэхгүй байх үүднээс түүнд үүсгэсэн хэргийг хэрэгсэхгүй болгоогүй тохиолдолд байдал эвгүйтэж мэдэх юм.

МАН-ын генсек У.Хүрэлсүхийн хувьд экс даргаа алхам тутамдаа муулж, өөрийг нь хэлмэгдүүлсэн хүн хол явахгүй гэдгийг хэвлэлд өгсөн ярилцлагадаа ил тод зарласан билээ. Улс төрийн нам хоорондын дайн бараг нэг жилийн өмнөөс эхэлсэн бөгөөд ирэх сонгууль хүртэл халуухан тэмцэл өрнөх нь тодорхой байна.
А.Харанга wikimon.