МОНГОЛЫН ТӨР ӨНӨӨДӨР ДАЙСНАА ДАРЖ, ДАРХАН ЦОЛОО МАНДУУЛАВ!

“Өнөө өглөө аргагүй нулимс дуслуулав. Визний хугацааг минь сунгаж өгөөгүйгээс болж, гэр орноо орхин, хилийн дээс даван гарч явахад хүрлээ. Удахгүй Монгол орныг ахин харна гэж найднам.

Гэргий минь үлдэж байгаа нь харамсалтай” гэж хазара залуу Али Арифи фэйсбүктээ бичээд, хөөгдөн явлаа. Өөрийгөө монгол цустай цөстэй гэж боддог энэ залуу өвөг дээдсийнх нь түүхэн эх орон гэж итгэдэг Монголын сайхан оронд амьдрахыг хүссэнээс өөр ямар ч гэм хийгээгүй. Би сайн мэднэ. Түүний гэргий Анхтуяа ч нулимс асгаруулан, гэр бүлийн амьдралынхаа дөнгөж гараан дээр хагацлыг мэдрэн хоцорлоо.

Магистрт сурч байсан Насим Фарасу мөн өчүүхэн ч утга учиргүйгээр хөөгдөн Монгол улсаас явав. Одоо тэднийг ямар учраас Монголоос хөөгдөв гэсэн хатуу ширүүн асуулт, магадгүй хилсдүүлэлт хэлмэгдүүлэлт Афганистанд угтах болно. Нэг эмэгтэй магистрантыг өршөөсөн гэнэ. Гэм зэмгүй хүүхдийг өршөөнө гэж байх уу?

Монголын төр бусад улс үндэстэнд ая тал засаж, хамаг байдгаа өргөн барьж, хүссэн хүн бүхнийг нь оруулж дураар нь дургиулж, үүнийхээ төлөө уучлал гуйж байдаг хэрнээ монгол туургатнаа нэг нүдээр үздэггүй, байнга хөөж тууж, ялгаварлан гадуурхаж, хэлмэгдүүлэн хохироож байдаг аа. Монголын иргэн бидэндээ ч тэгж ханддаг шүү дээ.

Гэв гэнэт л үндэсний аюулгүй байдалд аюултай тул хазара магистрантуудыг гаргана гэж хуйсганаж, ахин хазара оюутан авч болохгүй гэж сургуулиудад анхааруулж, энэ хуурамч фабрикдсан хэргээ мугуйдлан зүтгэсээр байгаад бүтээлээ. Ингэлээ гээд биднийг хэн хэлж, нохойг хэн саах вэ гэж санадаг нь ч амьдралд бэлхнээ хэрэгжих аж.

Юун учраас гаргаж байгаа гэдгээ хэлээгүй аж. Хазара, муслим учраас терроризмын аюултай гэж гүжирдэн мунхагласан шиг байгаа юм. Хазарачууд террористууд биш шүү, үсэг бичиггүйчүүд ээ. Муслимууд террористууд биш, Монголд олон түмээрээ энх амар аж төрдөг юм, харанхуйчууд аа. Яс үндсээр ялгаварлаж байж, муу дээрээ муухай болов, харгис дэглэмчид ээ. Шашнаар гадуурхаж байж, Монгол эх оронд минь гай тарив, дарангуйлагчдын гар хөл болсон мануухайнууд аа.

Монгол туургатан хүнтэй ханилсан монгол иргэний гэр бүлийг бусниулах нь их кайфтай, маньяктай ажил байдаг юм шиг байгаа юм, манай төрийн зарим албан хаагчдад. Хоёр жилийн өмнө, өмнөд монгол нөхрийг нь Хятадад болохоор террорист гэж гүтгэн тушааж, энд болохоор Хятадын тагнуул гэж гүжирдэн танилцуулж, эцэстээ Монголын иргэн гэргий нь АНУ-д очиж байж, гэр бүлтэйгээ нэгдсэн.

Монголын өөр нэгэн иргэн, бие давхар бүсгүй өмнөд монгол нөхрөө нэхэн уйлж хайлж байхыг би харж байсан. Харь халимаг бүсгүйтэй суув гэж үзэн ядаж, манай нэгэн иргэн залууг танхай зэрлэг консул дахин дахин зодож, алах нь халаг зовоож байсан байдаг, эцэстээ тэр гэр бүл салж сарнисан…

Тэгвэл ахин хайр сэтгэл хатуу цохилтод өртлөө. Арифи, Ариунаа гэх ариухан гэгээн сэтгэлт хоёр залуугийн нулимс ихийг үгүүлнэ…