УИХ дахь МАН-ын бүлгийн дарга Д.Хаянхярваа нарын хүмүүс  БНХАУ-д ажиллаад ирсэн байгаа. Далай ламын айлчлалаас хойш Хятадууд бидэнд хатуурхаж, тус улсад манай улсаас айлчлах ажлын айлчлалуудыг цуцлаад байсан. Тиймээс Хятадад очоод ирсэн Д.Хаянхярваа гишүүн юу хэлж ярих нь анхаарал татаж буй. Тэгвэл тэрбээр medee.mn сайтад өгсөн тодруулгадаа  “-Одоогоос хоёр долоо хоногийн өмнө миний бие УИХ-ын гишүүн Л.Энх-Амгалан, УИХ-ын даргын болон Ерөнхий сайдын гадаад бодлогын зөвлөх, МАН-ын нэг төлөөлөл гэсэн таван хүний бүрэлдэхүүнтэй айлчлах үеэрээ БНХАУ-ын Коммунист намын Гадаад хэргийн дэд сайд, Засгийн газрын Гадаад хэргийн дэд сайд нартай уулзсан. Уулзалтын үеэр Монгол Улсын Ерөнхий сайдаас БНХАУ-ын Ерөнхий сайдад илгээсэн захидлыг хүргэж өгсөн. Захидлын гол агуулга нь хоёр орны харилцааг ойрын хугацаанд хэрхэн сайжруулж болох вэ гэдэг асуудлыг хөндөж гурван үндсэн зарчмыг томъёолсон. Тухайлбал, Монгол Улс тус улсын “Нэг Хятад” бодлогыг тууштай дэмждэг. Манай улсад шашин төрийн асуудал тусдаа. Далай лам нь шашны байгууллагын шугамаар Монгол Улсад ирсэн. Хэдийгээр Монголын төр засгаас уриагүй боловч бид цаашдаа Далай ламын манай улсад айлчлах асуудалд анхаарлаа хандуулж тодорхой арга хэмжээ авч ажиллана. Мөн Х Богдыг тодруулах болон сургаж бэлтгэхдээ гаднын ямар нэг шашны нөлөөлөл оруулахгүйгээр Монгол Улсын шашны хутагт хувилгаадууд өөрсдөө тодруулж эх нутагт нь сургана. Монголын тал Далай ламыг эх орондоо хүлээж авсан тал дээр харамсаж байна гэсэн утгыг захидалдаа илэрхийлсэн. Хятадын зүгээс бидэнд тавьж байгаа шаардлага тун тодорхой. “Далай лам салан тусгаарлах бодлого баримталдаг. Гэтэл Монгол Улсын төр засаг Далай ламыг нутагтаа хүлээж авсан нь Хятадын эсрэг үзэл санааг дэмжиж байна гэсэн үг. Тиймээс бид танай улстай ямар нэг байдлаар харьцаагаа сайжруулахад хүнд байна” гэж хэлж байсан.Бидний өгүүлсэн захианаас хойш харилцаа нааштайгаар эргэх хандлага байгаа. Цаашид товлосон айлчлалууд үргэлжлээд явах магадлалтай. Өнөөдөр чуулганы хуралдаан дээр зарим нэг гишүүд “Далай ламд виз олгохгүй гэж байна”, “Тусгаар улс гэдэг зүйл алдагдлаа”, “Хятадын тал тулган шаардалт хийж байна” гэх мэтээр ярьж байна. Бид Далай ламд виз олгохгүй, Далай ламд дургүй ч гэдэг юм уу тэр өнцгөөс ерөөсөө хандаагүй. Өөрөөр хэлбэл, шашин шүтэх эрх Монгол Улсын иргэн бүрт нээлттэй. Эдийн засгийн гол түнш хөрш улсуудтайгаа улс төр, эдийн засгийн хувьд харилцааны хүйтрэл бий болох юм бол Монгол Улсын эдийн засаг тийм амар дээш гарахгүй. Монгол Улсын эдийн засгийн байдал амаргүй байгаа үед иргэн бүр улс төрийн болон эдийн засгийн харилцааны асуудалд анхаарах ёстойг ард иргэд ойлгох байх гэж найдаж байна.”хэмээн хэлсэн байна.

Эх сурвалж: Шуурхай.мн