“Эрдэнэс Тавантолгой” ХК-ийн гүйцэтгэх захирал асан Я.Батсуурийг   2015 оны хоёрдугаар сарын 25-нд “хүргэн” Г.Дэнзэнгийн гэх хэрэгт холбогдуулан цагдан хорьж байсан билээ.Улмаар түүнийг яллагдагчаар татаж, гурван сар цагдан хориод батлан даалтад гаргасан юм. Түүнийг  Г.Дэнзэнгийн эхнэрийн эзэмшлийн “Говь повер” компанид 4,5 тэрбум төгрөг шилжүүлсэн хэрэгт буруутгагдаад байсан ч түүнд холбогдох авлига, албан тушаалын гэх тодотголтой хэрэг шүүхээр шийдвэрлэгдэлгүй Өршөөлийн тухай хуульд хамрагдсан байдаг.  Харин тэрбээр  эл шийдвэрийг хүлээн зөвшөөрөхгүй байсан бөгөөд асуудлаа шүүхээр шийдүүлнэ гэсэн байр суурьтай байгаа мэдээлэл байсан. Тэрбээр “Надад холбогдох үйлдэл сая батлагдсан Өршөөлийн тухай хуульд хамрагдахаар байгаа. Нэгэнт би хэрэг хийгээгүй. Гэмт хэрэг мөн бишийг шүүх тогтоогоогүй байтал өршөөлд хамрагдаж хэлмэгдэе гэж бодохгүй байна. Тиймээс нэр төрөө сэргээлгэж, гэм буруугүй гэдгээ шүүхээр нотлуулна гэж мэдэгдээд байсан. Тэгвэл хүргэн Г.Дэнзэнд холбогдох хэрэг дахин хуулийнхны анхааралд хүчтэйгээр ороод байгаа энэ үед өөрийгөө өршөөлд хамрагдах ёсгүй гэж үзэж байгаа Я.Батсуурьд холбогдох хэргийн хувь заяа хэрхэх вэ гэдэг асуудал анхаарал татаж байгаа юм.

Эх сурвалж: Шуурхай.мн