Хөвсгөл аймгийн Тосонцэнгэл сумын Гандандамчойлон хийдийн хосгүй үнэт олдворуудыг энэ сарын 12-13-нд шилжих шөнө хулгайлжээ.

Эл хэргийг үйлдсэн этгээдүүдийг цагдаагийн алба хаагчид шуурхай эрэн сурвалжилж, гурав хоногийн дараа баривчилсан байна. Хосгүй үнэт олдвор хулгайлсан этгээдүүд болох А, Б нар Гандандамчойлон хийдийн вакум цонхыг хагалан орж, хар морь хөлөглөсөн сахиус, Жигжид бурхны мандал хот гэж нэрлэгддэг эртний зурмал бурхан, Авид бурхны зурмал хөрөг, нэр нь үл мэдэх шавар тогтоц бүхий бурхан, шаазан ваар, мөн 20 ширхэг шавар бурхан зэрэг түүхийн хосгүй үнэт зүйлсийг хулгайлсан байжээ.

Хэргийг УМБГ-ын Онц хүнд гэмт хэрэгтэй тэмцэх хэлтэс, Орхон, Хөвсгөл аймгийн цагдаагийн газрын хамтарсан ажлын хэсэг шалгаж байгаа юм байна. Тус ажлын хэсэг одоогоор түүхийн үнэт зүйлсийг үрэгдэж, зарагдахаас өмнө хураан авсан байна. Харамсалтай нь эдгээр түүхийн хосгүй үнэт олдворыг хадгалж байсан Гандандамчойлон хийд нь хамгаалалтын дохиололгүй байсан аж.

Хар морь хөлөглөсөн сахиусыг 1700 оны үед Ахай бээсийн хошууны ноён Төв дархан гүн Төвдийн хөх нуураас залж авчирч байсан гэнэ. Төвд нэр нь Таогчойжил гэх энэхүү өргөмжит сахиусанд нутгийн иргэд сүсэглэн залбирдаг байжээ. Эх сурвалжийн мэдээлснээр дээрх түүхийн хосгүй үнэт олдворыг хадгалж байсан Гандандамчойлон хийд нь хамгаалалтын дохиололгүй байсан аж.

Энэ нь гэмт этгээдүүдийг хулгайн хэрэг үйлдэж, үнэт эд зүйл алдагдахад хүргэсэн байж болзошгүй гэнэ. Тиймээс цагдаагийн байгууллагаас түүхийн үнэт олдворын хадгалалт, хамгаалалтыг сайжруулахыг холбогдох яам болон байгууллагуудад анхааруулж байна.

О.Сайхан