Хүүхдийн мөнгийг ялгавартай олгох нь Үндсэн хууль зөрчиж байна гэх мэдээллийг гишүүн асан С.Одонтуяа хэвлэлийнхэнд өглөө. Тэрбээр УИХ-ын 2016 оны есдүгээр сарын 7-ны өдрийн 38 дугаар тогтоолын холбогдох хэсэг нь Үндсэн хууль зөрчсөн эсэхэд дүгнэлт гаргуулахаар Үндсэн хуулийн цэцэд хандсан байна. Тэрбээр  хүүхдийн мөнгө бол нийгмийн халамж биш. Хүний хөгжил сангаас хүүхдийн мөнгөөр дамжуулан өрх гэрийг дэмжих, төрөлтийг нэмэгдүүлэх хүн ам зүйн бодлогыг дэмжсэн чухал бодлого. Тиймээс дээрх асуудлаар Үндсэн хуулийн цэцэд гомдол гаргаж, дүгнэлт гаргуулахаар хандаж байгаа гэв. Үндсэн хуулийн зүйл заалт зөрчсөн асуудлаар байр сууриа илэрхийлэхдээ  “Хүний хөгжил сангаас Монгол Улсын иргэнд 2016 онд хүртээх хишиг, хувь хэмжээг тогтоох” УИХ-ын 2015 оны 103 дугаар тогтоолын 2 дугаар хэсгийг өөрчилсөн байна. Ингэхдээ 2016 оны 7-12 дугаар сард амжиргааны түвшний 1-10 дугаар бүлэгт орсон хүүхэд бүрт бэлэн мөнгөөр, үлдсэн хүүхдийн мөнгийг хойшлуулан 2019 оноос эхлэн нөхөж олгохоор болсон. Энэ нь хүүхдийг ахуй амьдралаар нь ялгаварлан гадуурхаж байгаа илрэл бөгөөд Үндсэн хуулийн олон зүйл заалтыг зөрчсөн гэж үзэж байна гэлээ. Тухайлбал,Үндсэн хуулийн 1.10.2 дахь хэсэг “Монгол Улс олон улсын гэрээгээр хүлээсэн үүргээ шударгаар сахин биелүүлнэ” гэснийг, 2.14.1, 2.14.2 дахь хэсэг “Монгол Улсад хууль ёсоор оршин суугаа хүн бүр хууль, шүүхийн өмнө тэгш эрх байна” гэснийг, 2.16.5 дахь хэсэг, 19.1 дэх хэсэг “Хүний үндэс, угсаа, хэл, арьсны өнгө, нас хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор нь ялгаврлан гадуурхаж үл болно. Хүн бүр эрх зүйн этгээд байна гэхчлэн  олон зүйл заалтыг зөрчсөн гэх мэдээллийг хийлээ.