Fancy Bear-ийн хакерчид Олон Улсын Допингийн төвийн сүлжээнд нэвтэрч, допингийн төрлийн эм бэлдмэл хэрэглэдэг тамирчдын нэрсийг цацсаар байна. Одоогоор алдартай тамирчдаас АНУ-ын гимнастикч, Риогийн олимпийн дөрвөн алтан медальт Симона Байлс, мөн АНУ-ын эгч дүү теннисчин Винус болон Серена Уильямс нар допингийн төрөлд хамаардаг эм бэлдмэлийг байнга хэрэглэдэг нь тодорхой болоод байгаа юм. Хакерчдын гаргаж тавьсан нэрс болон материал үнэн гэдгийг Симона Байлс өөрөө хүртэл баталж, анхаарал төвлөрүүлэх тал дээр багаасаа асуудалтай байсан тул эм хэрэглэдэг гэдгэ э хүлээн зөвшөөрсөн.
Тэгвэл ОХУ-ын хөнгөн атлетикчид болоод паралимпийн тамирчдыг допингийн асуудлаас шалтгаалан Риогийн олимп, паралампид оруулаагүй. АНУ-ын эрүүл тамирчид допинг хэрэглээд, түүнийг нь нуун дарагдуулаад Риогийн олимпод оруулж болдог хэрнээ ОХУ-ын хөгжлийн бэрхшээлтэй иргэдийг паралимпод оруулаагүй явдалд эгдүүцэж буйгаа ОХУ-ын Ерөнхийлөгч Владимир Путин илэрхийлсэн байна.
“Бид хакерчдын ажиллагааг дэмжиж, зөвтгөж байгаа юм биш. Гэхдээ тэдний олж гаргаж тавьсан баримтууд спортын ертөнц болоод дэлхий нийтийн анхаарлыг татахгүй байхын аргагүй байна. Маш олон эргэлзээтэй асуудлууд гарч ирж байна. Эрүүл тамирчид допингийн төрлийн эм бэлдмэл байнга хэрэглэж буйг зөвшөөрч, түүнийг нуудаг хэрнээ хүнд өвчтэй, хөгжлийн бэрхшээлтэй тамирчдыг болохоор хардаж сэрдэн паралимпод оруулахгүй байна” гэж В.Путин мэдэгджээ.