Засгийн газар эдийн засгийн хүндрэлийг даван туулах арга замыг олох нь гарцаагүй хүлээсэн үүрэг нь. Гэхдээ сонгогч олны өмнө хүлээсэн үүргээ биелүүлэх гээд иргэдийнхээ ирэх олон жилийн амьдралын нөхцөл байдлыг бүр хүндрүүлж болохгүй. Энэ ч бас үүрэг гэдгийг сайн ойлгох хэрэгтэй. Тэрчлэн засгийн зүгээс төсвийн тодотголоор дамжуулан эдийн засагт арга хэмжээ авна гэж байгаа ч, тусгаад байгаа аргууд нь өөрөө буруу байгааг хэлэх эрхмүүд цөөнгүй байна. Тухайлбал, УИХ-ын гишүүн З.Нарантуяа хэлэхдээ  “Төсөв хүндрэлтэй, төсвийн орлого бүрдүүлэлтэд асуудал байгааг  ойлгож байгаа. Хамгийн гол нь төсвийн орлогын бууралтыг нөхөхийн тулд шууд аж ахуйн нэгжийн болон хүн амын орлогын албан татвар руу дайрч байгааг буруу гэж үзэж байна. Олох ёстой төлөвлөсөн орлогуудаа цуглуулах тал дээр Засгийн газар үлдсэн дөрвөн сард сайн ажиллах ёстой. Орлого олох суурь боломжуудыг нэмэх хэрэгтэй. Нийт төсвийн орлогын бүрдүүлэлтийг татварын ба татварын бус орлогоор нэмж байгаа. Татварын орлого дотор хүн амын орлогын, аж ахуйн нэгжийн орлогын албан татвар гээд цөөхөн орлогоор төсвөө бүрдүүлж байна. Гэтэл  орлого бүрдүүлэх бааз суурийг нэмэгдүүлэх өөр олон боломж байна. Үүнийг Засгийн газар олж хараасай гэж хүсч байна.

Төрийн өндөр албан тушаалтан, шүүгчдийн цалин, урамшууллыг бууруулах, нөгөө  талд нийгмийн даатгалын шимтгэлийг нэмж байгаа тэнцвэрийг харахад өчүүхэн бага зөрүүтэй байгаа. Тиймээс урсгал зардлын 576 тэрбум төгрөг дотроосоо асуудлаа эхэлж яримаар байгаа юм. Үнэхээр 576 тэрбум төгрөг урсгал зардалд зайлшгүй  шаардлагатай эсэхийг харж байж цалингийнхаа хяналтыг ярих хэрэгтэй.Тоймоор харахад 100 гаруй тэрбум төгрөгийн асуудал яригдаж байгаа. Засгийн газар заавал иргэдийн халаас руу орохгүй, бодит амьдралынхаа төвшинг дордуулахгүйгээр өөр олон арга хэмжээ хэрэгжүүлэх гарцыг хайх хэрэгтэй. Тийм гарц  бий.” хэмээн хэлж байна.