Өөрөөр хэлбэл, 2003 оноос өмнө үйлдвэрлэгдсэн гэсэн үг. Тиймээс хуучин, өнгө үзэмж муутай, хорт утаа ялгаруулдаг, хир даг болсон суудалтай микро автобуснууд бүгд жагсаалаас гарах учиртай.  Харин чанарын шаардлага хангасан 40 орчим микро автобус өнөөдөр нийтийн тээврийн үйлчилгээнд явж байх ёстой байв.
Гэтэл тийм зүйл болсонгүй ээ.  Буудлаа тасалж зарладаг, замын хөдөлгөөн дүрэм зөрчдөг, осол аваар гаргадаг, үнээ дураараа нэмдэг микроныхон дахиад бүтэн сарын хугацаанд  энэ мэт үйлдлээ давтах нь. Учир нь “Бага оврын автобус хэрэглэгчдийн холбоо” гэх газраас УИХ-ын Өргөдлийн байнгын хороо, Зам тээврийн  сайд, Нийслэлийн Мэргэжлийн хяналтын  газарт  насжилт хэтэрсэн тээврийн хэрэгслийг үйлчилгээнээс хасах асуудлыг түр хойшлуулж өгөөч гэж гуйсан юм байх.  Ингээд л асуудлыг дөрөвдүгээр сарын 1-нээс шийдвэрлэхээр хойшлуулчихаад байгаа гэнэ ээ.
Нэг сараар хойшлууллаа гээд юу өөрчлөгдөх вэ. Энэ асуултад хариулчих мэргэжилтэн, дарга байна уу. Яг үнэндээ юу ч өөрчлөгдөхгүй шүү дээ. Микроныхон нэг сарын турш дураараа дургина. Аягүй бол оройдоо үнээ 1000, 1500 төгрөг болгодог байсан бол одоо 2000, 3000 болгож ч магадгүй.  Тэд угаасаа л өөрсдийнхөө хүссэнээр явж байгаа. Ашиг олох ямар арга байна гэдгийг харна уу гэхээс иргэдэд тохь тухтай, аюулгүй нийтийн тээврээр үйлчлэх гэдгийг огт мэдэхгүй шүү дээ.
Нэг сарын хугацаа өглөө гээд насжилт хэтэрсэн микро автобусаа солихгүй. Өнөөх бохир заваан үйлчилгээ хэвээрээ л байна. Замын хөдөлгөөний дүрмээ зөрчсөөр байх болно. Салах эхнэрт үхэр, тугал нийлэх хамаагүй гэдэг үг байдаг даа.
Нэгэнт үйлчилгээнд явж чадахаасаа өнгөрч байгаа хойно тэд нэг сарын хугацаанд ахиухан хэдэн төгрөг олох л арга хайна. Түүнээс биш энэ ажлаа үргэлжлүүлье, ямар нэг аргаар он залуутай бага оврын автобус оруулж ирье гэж сэтгэх болов уу даа. Үгүй л байх. Тийм болохоор журмаа бариад, ямбий микронуудыг, ярьдаг тасалбар хураагчдыг, яаруу, замын хөдөлгөөний дүрэм мэддэггүй жолооч нарыг нь Улаанбаатарын зам дээрээс зайлуулсан нь дээр байсан юм биш үү.
Энэ нэг сарын хугацаанд микро автобуснууд ноцтой осол гаргаж, хүний амь нас хохирвол яах вэ. Олон хүн эд хөрөнгөөрөө хохирох ч магадлал өндөр шүү дээ. Хаагуур хамаагүй дайрч давхиж байгаа юм чинь осол гаргахгүй гэх газаргүй. Тэгвэл хасах ёстой хугацаанд эрхийг нь хасаагүй дарга нар хариуцлага хүлээх үү. Нэгэнт журам гэж гаргасан бол түүнийгээ хэрэгжүүлээд, дагаж мөрдөөд л явах хэрэгтэй. Тэгэхгүй энэ хэдэн микрочдынхоо толгойг илсээр байгааг “Давгын ор”-оо булаалгачихлаа байна.
Ядаж л хянадаг газар гэж алга. Нийтийн тээврийн газрынхан нь хүн хүч хүрэлцэхгүй учраас микроныхон юугаа хийж, хуйхаа майжих нь  манайд хамаагүй гэж яриад л байж байдаг.

Нөгөө талаар энэ хэдэн ямбий микрог нийтийн тээврийн үйлчилгээнээс хасчихвал байдал хэцүүдэх гээд байгаа гэнэ ээ. Мэдээж орон зайг нь нөхөхөд бага зэрэг хэцүү л байх. Гэхдээ байхгүй бол яаж ийгээд болгоно шүү дээ.

Автобусныхаа тоог нэм. Өөр он залуутай, цэвэрхэн бага оврын автобустай хүмүүстэй гэрээ хийгээд, хамтарч ажиллаж болж байна. Ер нь болгоё гэвэл юуг ч болгож болно. Тэгэхгүй ялих шалихгүй шалтаг хэлж, энэ хэдэн микрочдын толгойг илсээр байгаад нийтийн тээврийн үйлчилгээний стандарт, үнэ, маршрутыг эд зохиодог юм шиг л болчихоод байна.